Srağagün Topazın “Ayın oyunçusu” və “Ayın qolu” mükafatlandırma mərasimində PFL prezidenti Ramin Musayev “Premyer Liqada 8 hakimimiz var, amma onların heç də hamısının səviyyəsi derbi oyunları üçün kifayət deyil” – deyəndə kimləri nəzərdə tutduğunu açıqlamadı. Ancaq geridə qalan 7 turun və bu gün başlayacaq 8-ci turun təyinatlarına baxanda məsələnin heç də səviyyədə olmadığını görürsən.
Deyəsən hörmətsiz hakimbaşı Xaqani Məmmədov Rəhim Həsənovu “Qarabağ”la “göbək kərtməsi” edib. Həsənovun 8 turun 3-də Ağdam klubunun oyununa təyinat alması nın başqa adını ha axtardım, tapa bilmədim. Özü də Rəhim bu oyunların birində – birinci turda “İnter”lə oyunda – böyük biabırçılıq etmişdi. Heç bir əsas olmadan Qurban Qurbanovu tribunaya göndərmiş və hakimbaşının tumarını almışdı. Amma “Qarabağ” üçün heç də düşərsiz deyil ha, Rəhim. Onun idarə elədiyi hər iki oyunda ağdamlılar sevinib. Pzü də elə-belə rəqiblərlə oyunlarda da yox, “İnter” və “Xəzər Lənkəran”lsa qarşılaşmalarda. Üstəlik, onun Cənub klubuyla oyunda verdiyi tragikomik penaltinin də heç “qırx”ı çıxmayıb.
Həsənovun ayağı “Qarabağ”a nə qədər düşərlidisə, “Neftçi” üçün bir o qədər düşərsizdi. “Ağ-qaralar” onun fitinin səsini geridə qalan turlardan yalnız birində – “Bakı”yla qarşılaşmada eşidib ki, o da “matəm fiti” olub. “Zolaqlılar” o oyunda 3:0 hesablı qələbə qazanmışdılar.
Cari mövsümdə “Qarabağ”ın oyunlarına təyinatlara baxırsan. “Məmə yeyəndən – pəpə deyənə” hamının adı var, bircə Fariz Yusifovdan başqa. Üstəlik, Yusifov bu mövsüm “Neftçi”nin cəmi bir oyununda – “Xəzər Lənkəran”la – baş hakim olub. Belə olan halda sabahkı “Neftçi” – “Qarabağ” oyununa, demək olar, hər oyunda ciddi səhvlər buraxan Rəhim Həsənovu deyil, keçmiş FİFA referisinin təyin etməmələrinin səbəbi nədi, görəsən? Və ən önəmlisi, Fariz Yusifov bu mövsüm “Qarabağ”ın oyunlarına niyə təyin olunmur, Ramin bəy. Haqq eləmir? Yoxsa səviyyəsi çatmır?!
Birinci tur: “İnter”-“Qarabağ” 1:2 (Rəhim Həsənov)
İkinci tur: “Qarabağ” – “Sumqayıt” 5:1 (Vüsal Əliyev)
Üçüncü tur: “Qarabağ” – “Xəzər Lənkəran” 2:0 (Rəhim Həsənov)
Dördüncü tur “Qəbələ” – “Qarabağ” 0:1 (Əliyar Ağayev)
Beşinci tur: “Qarabağ” – AZAL 0:1 (Ramil Diniyev)
Altıncı tur: “Rəvan” – “Qarabağ” 1:1 (Səbayel Qurbanova)
Yeddinci tur: “Qarabağ” – “Simurq” 0:0 (Rauf Cabbarov)
Səkkizinci tur (sabah keçiriləcək): “Neftçi” – “Qarabağ” (Rəhim Həsənov)
Saleh Arslan
