Ötən axşam Tofiq Bəhramov adına Respublika stadionunda möhtəşəm atmosfer vardı. Hamımız “Qarabağ”ın “Seltik” kimi güclü rəqibi keçib, ilk dəfə Çempionlar Liqasına pley-off mərhələsinə iştirakçısı olmasına azarkeşlik etdik. Ancaq əfsuslar olsun ki, arzumuzun həyata keçməsi üçün hələ ən azı 1 il də gözləməli olacağıq.
1 qol, 1 qələbə
Beləliklə, “Qarabağ” ardıcıl 2-ci mövsüm ÇL-də mübarizəni III təsnifat mərhələsində dayandırdı. Ancaq budəfəki çıxış fərqli oldu. Belə ki, ötən mövsüm 4 oyundan 3-də qələbə (1:0, 4:0, 2:1) və 1 məğlubiyyət olmuşdusa (0:2), bu dəfə 1 qələbə (1:0) oldu və yeganə qol həmin matçda vuruldu. Qalan 3 matçdan 2-si qolsuz bərabərliklə nəticələndi. Bu dəfə də yeganə məğlubiyyət səfərdə qeydə alındı – Şotlandiyada 0:1. Hər 2 ev matçı isə eyni hesabla – qolsuz bərabərliklə bitdi. Göründüyü kiçi, ÇL-də artıq bizim üçün başa çatan mövsümdə öz meydanımızda qol vura bilmədik.
Maraqlıdır ki, “Qarabağ”ın ötən mövsüm qrup mərhələsini nəzərə alsaq, son 5 ev oyunundan 4-də 0:0 hesabı qeydə alınıb. Bunlar “Rudar” və “Seltik”dən öncə qrupda “Sent-Etyen” və Milan “İnter”iylə matçlardır. Respublika stadionunda son qələbə isə 1 il öncə “Zalsburq” üzərində 2:1 hesablı nəticədir.
Məlum olduğu kimi, “Qarabağ”ın ÇL-də yeganə qolunun müəllifi Reynaldo Silva oldu. Braziliyalı hücumçu Ağdam təmsilçisində avrokuboklarda vurduğu qolların sayını 8-ə çatdıraraq, Azərbaycan klublarının bombardirləri siyahısında liderliyə yüksəldi. 1 qol az olsa da, antirekord deyil. Belə ki, “Neftçi” “Vidzev”, “Dinamo” (Zaqreb) və “Skenderbeu”yla, “Şəmkir”isə “Barri Taun”la oyunlarda rəqib qapısına yol tapa bilməyib. Ancaq fərq ondadır ki, onda bu 2 komanda bir təsnifat mərhələsi, yəni 2 oyunun iştirakçısı olublar.
0:2 düşərsiz, 1:1 düşərli
İstənilən halda, “Qarabağ” avrokuboklarda çıxışını bitirmir. Sadəcə. turniri dəyişir, ÇL-dən Avroliqaya keçir və orada pley-offla qrupda düşməyə çalışacaq. Hər halda, Qurban Qurbanovun komandası ötən il bunu bacararaq, Hollandiyanın “Tvente” klubunu keçdi. Çempionumuza yenə də qrupa düşməyi arzulayır və buna nail olmaq yolunda uğurlar diləyirəm.
Bəs “Qarabağ”a klublarımızdan Avroliqanın həlledici mərhələsində kim yoldaş olacaq? Buna isə bu axşam – saat 21:00-da Bakıda başlayacaq 2 oyundan sonra biləcəyik. “İnter” “Atletik”lə, “Qəbələ” “Apollon”la cavab oyununa çıxacaq. “Bankirlər”in həm rəqibinin daha güclü olması, həm də ilk matçda hesab işinin çox çətin olduğunu göstərir. Bu isə deməkdir ki, mərhələ keçməyə şansı az olan Zaur Svanadzenin yetirmələri turnirdən əlini üzür.
Statsitika da “İnter”in xeyrinə deyil. Belə ki, indiyədək avrokuboklarda ilk oyunda səfərdə 0:2 hesabıyla uduzan təmsilçilərimizin heç biri mərhələ keçməyib. Sonuncu elə “İnter” olub ki, 2 il öncə Avroliqanın III təsnifat mərhələsində Norveçdə “Tromse”yə yenilən komanda Bakıda 1:0 hesabıyla qalib gəlsə də, bu, cütün qalibi olmağa bəs eləməyib. 0:2-ə görə mübarizəni dayandıran digər klublarımız “Şəmkir” (“Barri Tuan”), “Bakı” (“Sioni”) və “Xəzər Lənkəran” (“Makkabi” Hayfa) olub.
Ancaq “Qəbələ”də vəziyyət fərqlidir. Kiprdə “Apollon”dan yaxşı təsir bağışlayan Roman Qriqorçukun yetirmələri Bakıya 1:1 hesabıyla qayıtdı. Bu isə o deməkdir ki, komandamız istənilən hesablı qələbə, hətta qolsuz heç-heçəylə də mərhələ adlayacaq. Üstəlik, ilk oyunda səfərdə 1:1 klublarımız üçün düşərlidir. Belə ki, “Neftçi” (“Jerminal”), “Qarabağ” (“Streymur”), “Xəzər Lənkəran” (“Slima”) və elə bu mövsüm “İnter” (“Laçi”) bu nəticəylə mərhələ keçib. Yalnız 1 halda – “Qarabağ” Moldova “Zimbru”la dueldə mübarizəni dayandırıb. Onda cavab matçı da 1:1 hesabıyla yekunlaşıb və 30 dəqiqəlik əlavə vaxtda qələbə topunu vuran moldovalılar cütün qalibi olub.
“Apollon”un səfər oyununa diqqət
Sadəcə, “Apollon”un son 2 mövsümdə Avropa Liqasının qrupuna düşdüyünü, özü də Fransanın “Nitsa” və Rusiyanın “Lokomotiv” klublarını mübarizədən kənarlaşdırdığını unutmamalıyıq. “Dəmiryolçular”la sınaqda da ilk oyunda Kiprdə 1:1 hesabı qeydə alınmışdı. Ancaq “Apollon” Moskvadakı cavab oyununda gözlənilmədən 4:1 hesablı qələbə qazandı. Özü də “Lokomotiv” 4 qolu buraxandan sonra, yalnız 85-ci dəqiqədə təsəlli qolunu vura bildi. Limassol təmsilçisində fərqlənənlərdən Fotis Papulislə Turam indi də onun sıralarındadır. Yəni rəqibimizin səfərdə nəticə qazana bilməsi ona xüsusi diqqət yetirməyə sövq edir.
Bəli, “Qəbələ” üçün düşərli olan (göz dəyməsin) “Bakcell Arena” matçın startını gözləyir. İnanıram ki, Avroliqanın pley-offunda ən azı 2 təmsilçimiz – “Qarabağ”la yanaşı, buna çox yaxın olan “Qəbələ” də olacaq. Üç təmsilçimizin olması isə artıq futbolumuzda yeni tarixin yazılması demək olacaq. Necə ki, bu mövsümkü iştirakçılarımızdan hesabında ən çox qələbə (2) olan “Qəbələ” avrokuboklarda ilk dəfə 3 mərhələ keçib, yeni tarix yazmağa hazırlaşır…
Mehman Süleymanov
