Son dövrlər Türkiyənin “ Qalatasaray” klubu aldığı uğursuz nəticələrlə azarkeşlrini böyük üzüntüyə qərq etdi. Klubun işləri yolunda getmir. “Borussiya”ya (Dortmund) evdə, “İstanbul Başakşəhər” ə isə səfərdə 0:4-lük məğlubiyyət rəzalətin son həddi idi. “Cim-bom”un Azərbaycanda da yüzlərlə azakeşi var və təbii ki, onları da klubunun gələcəyi maraqlandırır. Yerli azarkeşlərin və mətbuatın əksər hallarda belə xəbər və açıqlamaları xarici idman portallarından aldığı məlum məsələdir. Korner.az bu işdə ilkə imza atıb azərbaycanlı dostlarımız sayəsində “Qalarasaray”ın keçmiş prezidenti Ünal Aysalın baş müavini, həm də klubun idman direktoru olmuş, qalmaqalları ilə məşhur Bülənt Tulunla əlaqə saxlayıb, suallarımıza cavab almaq istədik.
Təəssüf ki, Bülənt bəylə planlaşdırılan müsahibə alınmadı. Niyəsini özündən öyrənin: “Mən indi xaricdəyəm. Fransada. Necə edək ki, qardaşım? Küçədə gəzirəm hal-hazırda. Harda edək, necə edək axı müsahibəni? Həm də telefonla olmaz. Harda görülüb telefonla müsahibənin alındığı? Zəhmət çək, gəl yanıma, danışaq”.
Bülənt bəydən bizə müsahibə üçün müyyən vaxt ayırmasını dəfələrlə xahiş etsək də, cavab belə vermədən telefonu qapatdı. Belə hallarda isə təmsil etdiyin KİV-in verdiyi məsuliyyət insanda jurnalist “sırtıqlığı” yaradır ki, bunun da, əslinə qalsa, xeyrindən çox, ziyanı var. Ardıcıl, dayanmadan etdiyimiz zənglərlə Tulunu bezdirməyimiz müəyyən mənada məsələnin əsl üzünü açmağa vadar etdi: ”Bəsdir, qardaşım bəsdir! Yetər, nə olar, rahat burax, vallah, mən özüm danışmaq istəmirəm. Mənim “Qalatasaray”la heç bir əlaqəm qalmayıb. Nə suallarınız varsa, klubun idarə heyəti üzvlərinə verin, mənlik deyil. Yox,yox mənim bu mövzularda danışmaq fikrim yoxdur”. Daha sonra isə Bülənt bəy “xeyirli günlər” – deyib, yenidən dəstəyi asdı
Ürfan Məmməd
