“Qəbələ”də durumlar heç də yaxşı deyil. Xüsusilə də “Rəvan”la son qarşılaşmadan sonra vəziyyət daha da gərginləşib.
Korner.az-ın məlumatına görə, baş məşqçi Yuri Syomin artıq komandada futbolçulara nəzarəti itirib.
“Rəvan”la matçın gedişində Elnur Allahverdiyevin Dodo ilə mübahisə etməsi də buna bariz sübutdur. Bundan başqa, matçdan sonra Daniel Subotiçlə Leonardo da Silva arasında da insident yaşanıb. Bildiyiniz kimi, Subotiç ikinci penaltini vurmaq istəsə də Syominin istəyi ilə bu hüququ Leonardo qazanmış, lakin boşa vermişdi.
Ən böyük narazılıq isə Marat İzmayılovla bağlıdır. Belə ki, Syominin öz həmyerlisini daim start heyətində oynatması və üstəlik yeri gəldi-gəlmədi hər oyundan sonra tərifləməsi digər futbolçuları tamam hövsələdən çıxardıb. Onlar eyni zamanda bu qənaətdədir ki, rusiyalı futbolçu ümumi ansanbıla uyğunlaşa bilmir, əksinə, bu ansamblı pozur. Hətta deyilənə görə, onlar öz narazılıqlarını klub rəhbərliyinə də çatdırıblar. Bu mənada ola bilsin ki, növbəti turda “Simurq”a qarşı oyunda Maratı start heyətində görməyək.
Rekord.az
