"Qəbələ"nin 13 yaşa qədər futbolçulardan ibarət komandası ənənəvi "Əlincə" turnirinin qalibi olub.
Korner.az-ın klubun saytına istinadən yaydığı xəbərə görə, qrup mərhələsini bir qələbə ("Qəbələ"-"Əlincə" 3:2) və bir heç-heçə ilə ("Qəbələ"-ROİL 0:0) yekunlaşdıran "qırmızı-qaralar" yarımfinalda Bakı "İnter"i ilə qarşılaşıblar. Oyun boyu üstünlüyü əldən verməyən "Qəbələ" rəqibini 1:0 hesabilə məğlub edib. Yeganə qolu Samir Ağakişiyev vurub.
Finalda "Qəbələ" kubok uğrunda "Neftçi" ilə mübarizə aparıb. İlk dəqiqələrdən təşəbbüsə yiyələnən Sərdar Qafarovun yetirmələri bu üstünlüyü sona qədər qoruyublar. Oyun boyunca bir neçə fərqlənmək imkanı qazanan "qırmızı-qaralar" ikinci hissənin əvvəlində – 22-ci dəqiqədə hesabı açmağa müvəffəq olublar. Yarımfinalda komandasına qələbə qazandıran Samir Ağakişiyev qarşısıalınmaz zərbə ilə "Qəbələ"ni irəli çıxarıb. Matçın qalan dəqiqələrində komandamızın daha bir neçə qol şansı yaransa da, hesab dəyişməyib və "Qəbələ" "Neftçi"ni məğlub edərək turnirin qalibi adına yiyələnib.
Matçdan sonra təşkil olunan təltifetmə mərasimində mükafatçılara kubok və medallar təqdim edilib. "Qəbələ"nin qolkiperi Sərxan Osmanov turnirin "ən yaxşı qapıçı"sı nominasiyasının qalibi olub.
