Paytaxt klubu üçün 300-cü qol

Premyer Liqanın təsnifat mərhələsinə bazar günü keçirilən son turla yekun vuruldu. Hesabat turunda bir sıra maraqlı məqamlar yaşandı. Məsələn, 6 oyuna komandaların rəqib qapısına 21 qol vurduğunu qeyd edə bilərik ki, bu da mövsümün rekordudu.

Korner.az-ın məlumatına görə, üstəlik, məhz bu turda cari mövsümün 300-cü qolu qeydə alındı. Nəticəsi ləğv olunan "Simurq” – "Rəvan” oyununda meydan sahiblərinin texniki qələbəsi nəzərə alınmasa, təsnifat mərhələsinin son turunadək 295 qol vurulmuşdu. Deməli, turun 5-ci qolu yubiley xarakterli olacaqdı…

Bu əlamətdar olayı "Rəvan”ın üzvü Şəhriyar Rəhimov öz adı ilə bağladı. Klubun rəsmi saytının verdiyi xəbərə görə, "Bakı”yla görüşdə komandanın yegənə qoluna cərimə zərbəsindən vurduğu qolla imza atan Şəhriyar "Rəvan” forması ilə ilk qolunu vurmaqla yanaşı, Premyer Liqanın cari mövsümün 300-cü qolunun da müəllifi oldu.

AZAL – "Qəbələ” oyunununda da 12-ci dəqiqədə qol oldu. Qonaqların legioner futbolçusu Mustafa Dabo fərqləndi. Qollar eyni dəqiqədə vurulduğundan hər iki futbolçu 300-ə şərik oldular. 2012/13 mövsümünün ilk qolunu "Kəpəz”də oynadığı vaxt İrakli Berayanın, 100-cü qolunu "İnter”li Nizami Hacıyevin, 200-cü topunu isə AZAL-ın hücumçusu Zohair Benuahinin vurduğunu da qeyd edək.