“Qarabağ “klubunun yarımmüdafiəçisi Namiq Yusifovun korner.az-a müsahibəsi.
– Komandanızın hazırlığı necə gedir?
– Hər şey qaydasındadır, yaxşı məşq edirik. Daxili ab-hava gözəldir.
– Komanda yoxlama görüşlərində yetərincə adlı-sanlı rəqiblərlə qarşılaşacaq. “Şaxtyor”un gücü hamıya məlumdur. “Viktoriya” (Plzen) isə müntəzəm olaraq Çempionlar Liqasının qruplarında iştirak edən komandadır. “Sparta” (Praqa) ötən mövsüm Çexiya çempionu olub. Onlardan qorxmursunuz?
– Yox, nə qorxmaq, bunlar hazırlıq oyunlarıdır, belə rəqiblərlə qarşılaşmaq lazımdır ki, zəif tərəflərimiz aşkar olsun.
– Yeni transfer Danilo Dias haqqında nə deyə bilərsən?
– Onun haqda nəsə demək mənim işim deyil. Amma bir şeyi qeyd edim ki, “Qarabağ” elə-belə futbolçu almır. Portuqaliya liqasında oynaması bir çox suala cavab verir.
– Futbolçulara birdən-birə 1 aylıq istirahət verilməsi əngəl törətməyəcək?
– 1 ay deyəndə ki (gülür)… Yetərincə vaxt var. Hamı öz formasını bərpa edə biləcək.
– Yeni transerlərdən yalnız Diası ciddi mənada güclənmə hesab edə bilərik. Bu heyət Avropada uğur qazanmaq üçün yetərlidirmi?
– Tərlanla Cavid də perspetivli futbolçulardır. “Qarabağ”ın bütün transferləri, inşallah, komandaya kömək edəcək.
– İstər klub rəsmiləri, istərsə də futbolçular öz açıqlamalarında qrup mərhələsi haqda düşünmək üçün hələ tezdir deyirlər. Sanki klub daxilində özünəinamsızlıq var…
– Yox, həqiqətən, tezdir hələ. Heç kiminlə rəqib olacağımız bilinmir. Biz “Barselona” deyilik ki, özümüzü indidən qruplarda “hiss edək”. Birinci dəfədir, Çempionlar Liqasında iştirak edirik. Hazırlaşaq, görək başımıza nə gəlir.
– Gelaşvilinin getməsini nə dərəcədə ciddi itki hesab edə bilərik?
– Bu haqda nəsə demək mənlik deyil. Sadəcə onu deyə bilərəm ki, yaxşı insan və yaxşı futbolçudur. Ona uğurlar arzulayıram.
– Dünya çempionatını izləmək imkanın olubmu?
– Hə, izləyirəm, almanları çox bəyəndim.
– Çempionluğa əsas favoritin hansı komandadır?
– İtaliyaya azarkeşlik edirəm, amma almanlar çempionluğa əsas namizəddir.
Ürfan Məmmədzadə
