Rusiya və Türkiyədə legioner həyatı yaşayan azərbaycanlı futbolçular üçün ötən həftə uğurlu keçməyib.
Korner.az-ın məlumatına görə, Türkiyədə forma geyinən oyunçularımızdan yalnız Subaşiç meydanda olub.
Branimirin şərəfini qoruduğu “Orduspor” səfərdə “Adanadəmirspor”a məğlub olub – 2:3. Hücumçumuz bu qarşılaşmada 90 dəqiqə meydanda olub.
Ufuk Budakın çıxış etdiyi “Qaziantep BB” öz meydanında “Adanaspor”la bacarmayıb – 1:1. Zədədən sonra heyətə qayıdan yığmamızın müdafiəçisinin adı “18-liy”ə daxil edilsə sə, meydana daxil olmayıb.
Öz meydanında “Karşıyaka”ya 2:3 hesabı ilə uduzan “Dənizlispor” isə Saşa Yunisoğluya ehtiyac duymayıb. Müdafiəçimiz zədəli olduğundan bu dəfə də “18-liy”ə düşməyib.
Davud Kəriminin heyətində olduğu “Fəthiyəspor” bu gün “Manisaspor”u qonaq edəcək.
Ruslan Abışovun şərəfini qoruduğu “Rubin” isə öz meydanında “Volqa” ilə qarşılaşıb. Bu matçda meydan sahibləri qalib gəlib – 3:1. Ruslanın adı oyunun protokoluna daxil edilməyib.
