Topaz Premyer Liqasının 32-ci turunda “İnter” doğma meydanda “Qəbələ”ni minimal hesabla məğlub etdi – 1:0. Bakılıların qələbə qolu Ramil Mansurovun aktivindədir.
Korner.az oyundan sonra keçirilən mətbuat konfransında hər iki baş məşqçinin səsləndirdiyi fikirlərlə sizi tanış edir.
Luis Araqon, “Qəbələ” klubunun məşqçisi: “Mövsüm başa çatdı, son oyunumuzda qalib gəlmək istəyirdik. Bundan öncəki oyunlarda uğurlu çıxış etmişdik. İlk hissədə üstün tərəf idik. Bir neçə qol imkanından yararlana bilmədik. İkinci hissədə bərabər səviyyəli oyun getdi. Rəqib əks-hücumda qələbə qolunu vurdu. Əvəzedici komandamızdan əsas heyətə cəlb etdiyimiz futbolçuların oyununu bəyəndim. Tərzin Cahangirov və Kamal Mirzəyevin gələn mövsümdən əsas heyətdə çıxış edə biləcəklərini düşünürəm”.
Kaxaber Sxadadze, “İnter” klubunun baş məşqçisi: “Komandamı oyuna və qazanılan qələbəyə görə təbrik edirəm. Son oyun olmasına baxmayaraq, futbolçular özlərini yaxşı tərəfdən göstərdilər. Bu, əsl peşəkarlıqdır. Komandada gələn il çox dəyişikliklər olacaq, layiqli futbolçular axtarışındayıq. Hər bir komandanın qarşısında minimal və maksimal hədəflər durur. Biz həmişə çempionluğa oynamışıq. Təəssüf ki, bu il alınmadı, üçüncü yeri tutduq. Lakin komandamın bu nəticəsini çox yaxşı sayıram. Minimal xərclə maksimum uğur əldə etməyə çalışırıq. Oyunumuzda daha çox ustalıq çatışmır. Transfer siyasətində daha diqqətli olacağıq. Ustalıq səviyyəsi yüksək olan futbolçular transfer etməliyik”.
