Son zamanlar Azərbaycan Cüdo Federasiyası və qurumun prezidenti Füzuli Ələkbərovdan şikayətlər çoxalıb. Avropa Oyunlarındakı uğursuz nəticədən sonra isə məsələ bir qədər də dərinləşib. İdmançılar onlara federasiya tərəfindən maddi yardım göstərilmədiyini bildirirlər.
Korner.az-ın məlumatına görə, bu gün gənclərdən ibarət cüdo üzrə Azərbaycan milli komandasının üzvləri “KoroğluÜ metro stansiyasının yaxınlıqdakı parkda toplaşıblar və federasiya haqqında olan şikayətlərini jurnalistlərlə bölüşüblər. Aksiyada kişilərdən ibarət komandanın 15-ə yaxın üzvü iştirak edib. Onlar öz problemlərini media nümayəndələri ilə bölüşüblər. İştirakçılar arasında dünya və avropa çempionatlarının mükafatçıları da olub.
İdmançıların bildirdiklərinə görə federasiya rəhbərliyi, prezident Füzuli Ələkbərov, vitse prezident Elnur Məmmədli onlarla maraqlanmır. İdmançılar qeyd etdilərki, onlar uzun müddətdir ki, təlim-məşq toplanışlarında iştirak etmir, il ərzində cəmi 2 dəfə yarışda iştirak ediblər.
90 kq çəki dərəcəsində Avropa çempionatının gümüş mükafatçısı Firudin Dadaşovun dediyinə görə onlara maaş verilmir, yarışlara öz hesablarına gedirlər: “Maliyyə problemlərinə görə uzun müddətdiki, təlim-məşq toplanışında iştirak etmirik. Əvvəllər heç olmasa İsmayıllıda toplanışa gedirdik, indi heç ora da gedə bilmirik. Gələn ay Avstriyada Avropa Çempionatı, oktyabrda isə BƏƏ-də dünya çempionatı keçiriləcək. Lakin federasiya bu yarışlara getmək üçün bizə şərait yaratmır. Bizə deyiblərki, getmək istəyirsizsə, öz hesabınıza gedin. Buna isə imkanımız yoxdu. Hansı idmançının 2000 manatı var yarışa getməyə? Biz yarışlarda özümüzə görə iştirak etmirik, ölkəmizi təmsil edirik. Qalib gəldikdə bayrağımızı dalğalandırırıq, himnimizi səsləndiririk. Dəfələrlə federasiya rəhbərliyinə müraciət etmişik, lakin şikayətlərimizə baxmayıblar. Ümidimiz ölkə başçısınadı. Cənab prezidentə və Mehriban Əliyevaya müraciət edəcəyik”.
55 kq çəkidə çıxış edən Sadıq Məhərrəmli də federasiyanın onlara diqqət göstərməsindən şıkayətləndi: “Bizim məqsədimiz dünya arenalarında ölkəmizi layiqincə təmsil etməkdi. Lakin bu cür biganəliklə heç bir uğur qazana bilmərik. Federasiya rəhbərliyi bizə köməklik göstərmir. Nəticə göstərmək üçün maliyyəyə ehtiyacımız var. Belə olan halda cüdonun inkişafından söhbət gedə bilməz. Biz gənclər bir neçə ildən sonra əsas milli komandanın üzvləri olacağıq. Amma belə münasibətlə, təlim-məşq toplanışları keçmədən, yarışlarda iştirak etmədən nəyəsə nail ola bilmərik”. (sportal)
