Azərbaycanın milli komandasının və “Neftçi”nin müdafiəçisi Mahir Şükürov klubunun son illərdə keçirəcəyi ən vacib oyununa hazırdır.
Korner.az– ın məlumatına görə, Şükürov sabahkı oyun haqda UEFA-nın rəsmi saytına fikirlərini bildirib.
“Meydana yalnız qələbə üçün çıxacağıq. “Neftçi”nin təqdimata ehtiyacı yoxdur.SSRİ dövründə Azərbaycan futbolu “Neftçi”nin sayəsində tanınıb. Bunlara baxmayaraq hətta Azərbaycanda belə, bizim Avropa Liqasının qrup mərhələsinə düşə biləcəyimizə inanmırdılar. Amma APOEL kimi güclü bir klubu yendik. Tarix-tarixdir, bu gün özümüzə hörmət qazanmaq üçün ancaq Avropa arenalarında uğur qazanmalıyıq. Çox şadam ki, “Neftçi” avrokubokların qrup mərhələsinə düşən ilk Azərbaycan klubu oldu.”
“İnter”in "bizə" yuxarıdan-aşağı baxması haqda deyilənlərə fikir vermirəm. “Neftçi” adlı-sanlı bir kluba öz gücünü göstərəcək və qələbə qazanmağa çalışacağıq. Qələbə elə də asan deyil. Ancaq bütün komandayla qələbəyə köklənmişik."
Bununla yanaşı, Mahir “Neftçi”nin heyətində ardıcıl iki il çempion olmuş gənc futbolçular haqda da danışıb. Onun fikrincə, “Neradzzura” ilə oyun gənclərin üzünə yeni qapılar açılmasına şans yarada bilər.
“Neftçi”nin heyətində gənc perspektivli futbolçular çoxdur. Onların oyunu italyan skautların marağına səbəb ola bilər. Hər futbolçu üçün ölkə xaricində çıxış önəmlidir. “Anji”də qazandığım təcrübənin mənə çox köməyi oldu. Rusiya çempionatından “İnter”dən sonra qarşılaşacağımız “Rubin”i yaxşı tanıyıram. Yeri gəlmişkən, kazanlıların “Partizan”ı məğlub edəcəklərinə əminəm. Bizi “Rubin”lə çox maraqlı oyun gözləyir."
