“Mən müdafiə futbolunu xoşlamıram” – Elmar Baxşıyev

Korner.az xəbər verir ki, mütəxəssis oyunla bağlı bunları deyib:

“İndiki durumda futbol ikinci plana keçir. Biz komanda olaraq bütün fikrimiz cəbhə bölgəsindədi. Hər gün Ordumuzdan yeni zəfərlər gözləyirik. İnanırıq ki, Ordumuz bizi sevindirəcək və öz torpaqlarımızı qaytaracağıq.

Oyuna gəlincə, çətin olacağını bilirdik. “Sumqayıt” gənclərdən yaxşı təşkil olunmuş komandadı. Rəqib sürətli futbolu xoşlayır. Matça yaxşı hazırlaşmışdıq. Oyunun ədalətli nəticəsi heç-heçə idi.

Artıq 5 tur keçib. Hər qarşılaşmada hücumda oynayır, sırf arxa xətdə oturmuruq. Mən müdafiə futbolunu xoşlamıram. Müdafiədə olanda da hücumu düşünürük. Oyun ərzində yaratdığımız epizodlar da bunu göstərir. İnanıram ki yeni qoşulan Ceyms Adeniyi də komandaya fayda verəcək. Futbolçulardan razıyam, hücumda göstərdiyimiz oyundan məmnunam.

Bütün futbolçuları əsas heyət üzvü kimi görürük. Yurgen Qocanın zədəsi olduğu üçün onu qoruduq ki, durumu daha ciddiləşməsin. Murad Musayevin göstərdiyi əzmkarlıqdan razı qaldıq. Rafael Utriqin əvəzlənməsi yorulması ilə bağlıdı. Həm özü bunu istədi,  həm də hücumda kreativliyi artırmağa çalışdıq”.