“Mənə görə hələ də Azərbaycanın ən yaxşı futbolçusudu” – “Şerif”in baş məşqçisi
26.08.2020 , 22:36
Çempionlar Liqasının II təsnifat mərhələsində keçirilən “Qarabağ” – “Şerif” matçından sonra (2:1) qonaq komandanın baş məşqçisi Zoran Zekiç mətbuat konfransında jurnalistlərin suallarını cavablandırıb:
– Əvvəl 5 müdafiəçiylə oynadız. “Qarabağ”ın qolundan sonra komanda açılışdı və qol vurdu. Düşünmürsüz ki, əvvəldən belə oynasaz, daha yaxşı olardı?
– Əlbəttə, oyunla bağlı müəyyən planlarımız var idi. “Qarabağ”ı təbrik edirəm, onların Çempionlar Liqasının qruplarına düşməsini istəyirəm. Buraxdığımız ilk səhv penalti oldu, ardınca da qırmızı vərəqə aldıq. İstədiyimizi edə bilmədik.
– “Qarabağ”ın güclü tərəfləri hansılardır və oyunu dəyişmək üçün nələr etdiz?
– Oyundan əvvəl də demişdim ki, “Qarabağ”ın güclü oyunçuları var, topa yaxşı nəzarət edirlər. Penaltiyə qədər başa-baş oyun gedirdi. Hücumda daha kəsərli olmaq istəyirdik, alınmadı.
– Bu gün “Şerif”in oyunçuları antifutbol oynadı. Futbolçular rəqibi vura, yıxa-yıxa oynayırdılar. Moldova çempionatında da belə çempion olmusuz?
– Mən də bu gün hücum futbolu oynamaq istəyirdim. Amma bugünkü oyunu antifutbol saymıram. Hücumda intensivliyi yarada bilmədik.
– Oyun zamanı hakimə etiraz edirdiz. Onların qərarlarında səhv olduğunu düşünürsüz?
– Oyundan sonra hakimlər haqda danışmaq düz deyil. Onlar da səhv edə bilərlər. Hakimlər epizoda daha yaxın idilər, düz də ola bilərlər, səhv də.
– Qırmızı alan futbolçunu cəzalandıracaqsız?
– İndi başım ala-buladır. Bu haqda sabah düşünəcəyik.
– Oyundan əvvəl Qara Qarayevi xüsusi fərqləndirmişdiz. İndi necə bəs, Qara Qarayev haqda eyni fikirdəsiz?
– Mənə görə hələ də Azərbaycanın ən yaxşı futbolçusudur. Topla yaxşı rəftar edir. Mənə görə ən yaxşı azərbaycanlı futbolçudur.