“Qrup səddini adlamaq üçün ev oyunlarında istənilən rəqibə qalib gəlməliyik. Rəqibimizi çox yaxşı təhlil etmişik”.
Korner.az-ın məlumatına görə, bu sözləri Rusiyanın “Krasnodar” klubunun baş məşqçisi Oleq Kononov deyib.
Avropa Liqasının qrup mərhələsinin II turunun “Qəbələ” ilə sabahkı ev oyunu ərəfəsində baş tutan mətbuat konfransında çıxış edən mütəxəssis rəqibi yaxşı tanıdığını bildirib:
“Bu komandanın əksər futbolçularını tanımağım da matça daha yaxşı hazırlaşmağımıza kömək etdi. “Qəbələ” çox səviyyəli komandadı. Bu üzdən bizi çətin qarşılaşma gözləyir. Rəqibimizin çox yaxşı təşkil olunmuş oyunu və dəst-xətti var. Balanslaşmış heyətə malik “Qəbələ”də yaxşı legionerlər və yerli futbolçular çıxış edir. Onların bəziləri ilə birlikdə çalışmışam da. Bizdən bu qarşılaşmada tələb olunan maksimal konsentrasiyadı. Əlbəttə ki, qələbə əzmi də nümayiş etdirməli, həm hücum, həm də müdafiədə ustalıq göstərməliyik. Georgi Floresku və Sergey Zenyovla birlikdə çalışmışam. Sonuncu “Karpatı”da rəhbərliyim altında çıxış edib. O, “Qəbələ”də də özünü yaxşı tərəfdən göstərir. Bu hücumçuya xüsusi diqqət ayırmalı, gözümüzü ondan ayırmamalıyıq. Ukraynadakı məşqçilik karyeramdan Aleksey Qay, Aleksey Antonov və başqaları ilə də tanışam. “Qəbələ”də kifayət qədər səviyyəli legioner oynayır”. (Apasport.az)
