AFFA-nın baş katibi Elxan Məmmədov bugünlərdə verdiyi müsahibədə Məşqçilər Komitəsi üzvlərinin klublarda işləməkdə gözlərinin olmadığını demişdi. Sitat: “Məşqçilər Komitəsinə o insanlar seçilib ki, onların klublarda işləməkdə gözü yoxdu. Vaqif, Ağasəlim müəllim millidə, klublarda işləyib. Böyükağa müəllim öz tarixini yazıb. Diniyev də millidə işləyib. Şakir Qəribovu isə komitə üzvləri seçiblər”.
Bəs üzvlərin özləri nə düşünür bu haqda? Bu məqsədlə hamısı ilə əlaqə saxlasaq da, təkcə Böyükağa Hacıyevin cavab verməyə cürəti çatdı: “Mən inanmıran, Elxan Məmmədov elə bir açıqlama versin. Burda işləyənlərin hamısı elit şəxslərdi, hər kluba getməzlər. Yaxşı yerdən dəvət olsa, işləyər və nəticələr də qazanarıq. Mən həmişə demişəm və deyəcəyəm, heç vaxt iddiamı itirməmişəm. Sabah ürəyimə yatan təklif olsa, gedərəm və inanıram ki, AFFA da buna əngəl olmaz. Çünki birinci gündən bizim AFFA ilə bu barədə söhbətimiz olub. Qardaşım, yadından çıxmasın, orda oturanların hamısı azərbaycanlılardır. Hamımız bu dövlətin vətəndaşlarıyıq. Bizim futbolumuzdakı ən ali qurum mənə məsləhət gördü ki, Məşqçilər Komitəsində işlə. Biz futboldan ayrılmamışıq. Əksinə, futbolun lap içərisindəyik!”
Komitəyə Elxan Məmmədov tərəfindən dəvət olunmuş digər 2 üzv – Şahin Diniyev və Ağasəlim Mircavadov isə sualımıza qərəz və təxribata çəkmək damğası vurub baş katibin açıqlamalarını şərh etməkdən boyun qaçırdı. Vaqif Sadıqovla əlaqə yaratmaq cəhdlərimiz isə nəticəsiz qaldı. Soruşmaq eyib olmasın, niyə qorxursuz?
Ürfan Məmmədzadə
