Milli komandamızın baş məşqçisi Berti Foqtsun müsahibəsi.
– Biz artıq bir neçə gündür bir yerdəyik. Komandanın məşq prosesindən həzz alıram. Sabah FİFA-nın oyun günündə yoldaşlıq oyunu keçirəcəyik. Onu demək istərdim ki, futbolçuların fiziki hazırlığı yaxşı səviyyədədir. Futbolçuların fiziki durumu vacib amildi. Çünki millinin oyunundan sonra çempionat başlayacaq. Onu deyə bilərəm ki, indi yığmada seçim artıb, rəqabət yaranıb.
Klubdakı həmkarlarıma təşəkkür edirəm. Futbolçuların fiziki durumu yüksəlib. Bura 3 qapıçı ilə gəlmişik. Emil Balayev çox çalışır, amma təcrübəsi azdır. Kamran Ağayev artıq "Bakı"dadır, yalnız rəsmi müqavilə bağlamaq qalıb. İnanıram ki, rəsmi oyunlaradək hər şey qaydasında olacaq. Bəzi futbolçular üçün toplanış axırıncı şansdı.
Keçmişdə kim milli üçün nə edibsə, bu məni maraqlandırmır. Çünki mən irəli baxıram. Futbolçu millidə oynayırsa, canla-başla oynamalıdı. Futbolçu meydana çıxdısa, ancaq qələbəyə oynamalıdır. Futbolçular bunu dərk etsələr, yaxşı nəticə də gələcək. Təəssüflər olsun ki, apreldə nəzərdə tutulan təlim-məşq toplanışı baş tutmayacaq. Bizim üçün ən vacib qarşıdakı 2 rəsmi oyundur.
– Həmin toplanış niyə baş tutmayacaq ki?
– Yaxşı olardı ki, həmin sualı PFL-ə verəsiz. Məndən olsa, toplanışı keçirərdim.
– Rəşad Sadiqov Özbəkistanla oyunda görmədiyimiz mövqedə oynadı. Onun çıxışından nə dərəcədə razı qaldınız?
– Bu toplanışda Rəşad Sadıqovla Ruslan Abışov iştirak etmədi. Ona görə də, həmin mövqedə Sadiqovu sınadım. Çıxışı xoşuma gəldi və onu deyim ki, mən həmin eksperimentdən yenə istifadə edəcəm.
– Özbəkistanla görüşdə Rüfət Dadaşov necə çıxış etdi?
– O, yaxşı futbolçudur. Amma təəssüf ki, zədəli olduğundan sabahkı görüşdə meydana çıxa bilməyəcək. Əsas heyətdə yeni futbolçulardan yalnız Pərdis Fərcad-Azad olacaq. Sabahkı oyun Elvin Məmmədov üçün bir şansdı. Onun böyük bacarığı var, amma özünü göstərə bilmir. Onun kimi futbolçu millidə olmalıdı.
– Əsasən hansı klubların futbolçuları toplanışda zəif təsir bağışlayır?
– Biz bütün klubların baş məşqçiləri ilə danışmışıq. Ad çəkmək istəməzdim. Ancaq onu deyim ki, Azərbaycan çempionatında mübarizə aparan klubların baş məşqçiləri PRO lisenziyası almalıdırlar.
