“Çox şadam ki, Kazan “Rubin”i Abışovun xidmətində maraqlıdı“
"Hazırlıqlarımızdan tamamilə razıyam. Komandada yaxşı atmosfer var. Baxmayaraq ki, bəzi itkilərimiz də mövcuddu. Hədəfimiz Belfastda qələbə qazanmaqdı. Amma dörd il öncə belə itkilərimiz olsaydı, bunu heç vaxt deyə bilməzdim"
Korner.az-ın məlumatına görə, bu sözləri milli komandamızın baş məşqçisi Berti Foqts deyib.
Almaniyalı mütəxəssis bu gün baş tutan mətbuat konfransında ilk olaraq rəqibin Portuqaliyadan yaxşı əhval-ruhiyyədə qayıtmasına toxunub:
"Şimali İrlandiyaya qarşı mübarizə aparmaq çox çətindi. Yəqin ki, Portuqaliya ilə səfər heç-heçəsindən sonra bu komandada özünəinam daha da artıb. Həm də onlar ikinci mərtəbədə çox yaxşı oynayırlar. Ona görə də biz onların bu üstünlüklərindən yararlanmalarına imkan verməməliyik"
Foqts sabah baş tutacaq qarşılaşma haqda daha sonra bunları dedi:
“Əgər qələbə və ya heç-heçə ilə qayıda bilsək, çox yaxşı olacaq. Buna həm gücümüz, həm də imkanımız var. Biz hələ Rusiya ilə səfər matçında da uğur qazana bilərdik"
Alman çalışdırıcı qapıçı problemindən danışarkən, Rasim Ramaldanovun start heyətində meydana çıxa biləcəyini də, deyib:
"Qapıçı problemini həll edəcəyik. Mən kimi oynadacağımı bilirəm. Amma onu indi açıqlamayacağam.
Əla oyunçudu. Onunla tanış olduğumuz üçün şadam. O, futbola güləşdən gəlib (britaniyalı jurnalistlər Foqtsun bu xəbərinə gülürlər). Burda gülməli heç nə yoxdu. Rasim hətta start heyətdə də meydana çıxa bilər"
Sabahkı oyunda kapitan Ruslan Abışov ollacaq. Çox şadam ki, Kazan “Rubin”i Abışovun xidmətində maraqlıdı. O, təkcə Rusiyada yox, Almaniya və İngiltərədə də çıxış edə bilər. Ruslan oyunu çox yaxşı oxuyur. Həm də müdafiəçi olaraq çox texnikalıdı.
-“Neftçi” Avropa Liqasının qrup mərhələsindəki çıxışı ilə məyusluq yaratdı. Yığmamız bunu unutdura biləcək?" – sualına Foqtsun cavabı isə belə olub:
“Neftçi” məyus etdi? Bəs siz “İnter” və “Rubin” üzərində qələbə gözləyirdiniz? Məncə, kifayət qədər yaxşı oynadılar. Sevindirici məqam odu ki, ölkədə futbol inkişaf edir. “Neftçi” Avroliqanın qrup mərhələsində çıxış edir, Azərbaycan dünya çempionatı keçirir və sair. Əsas olan budu"
