Gürcü mütəxəssisdən qələbə şərhi
"Kəpəz"lə oyun bizim “Qarabağ”la keçirdəcəyimiz rəsmi qarşılaşmaya hazırlıq baxımından önəmli rol oynayırdı. Çempionatda yaranmış fasilə ilə əlaqədar futbolçularımın oyun praktikasını itirməməsi üçün bu cür yoxlama görüşü keçirməyi məsləhət bildik".
Korner.az-ın məlumatına görə, bu sözləri "Simurq" klubunun baş məşqçisi Georgi Çixradze "Kəpəz"lə keçirilən oyundan sonra deyib.
Zaqatala klubunun çalışdırıcısı komandasının "Qarabağ"la oyuna tam gücü ilə hazırlaşmalı olduğunu bildirib: "Oyun haqqında isə onu deyə bilərəm ki, matç çox templi və maraqlı keçdi. Birinci və ikinci hissədə fərqli-fərqli heyətləri meydana buraxdım.
Yoxlama görüşü olmasına baxmayaraq futbolçularımdan bu qarşılaşmaya çox ciddi yanaşmalarını istəmişdim. Oyundan qabaq verdiyim tapşırıqları tam olaraq yerinə yetirməyə çalışdılar. İndi isə bizi qarşıda çətin oyun gözləyir. Bu qarşılaşmaya tam gücümüzlə hazırlaşmalıyıq".
