Uzun illər AFFA-da İnformasiya və İctimaiyyətlə Əlaqələr Departamentinə rəhbərlik edən Mikayıl Nərimanoğluyla bağlı bu gün 2 istefa xəbəri yayıldı. Səhər saatlarında onun “Kəpəz”in Müşahidə Şurasının üzvü vəzifəsindən geri çağırılmasıyla bağlı rəsmi məlumat verildi. İş gününün sonunda isə məlum oldu ki, Nərimanoğlu 12 ildir rəhbərlik etdiyi departamentdə də tutduğu postdan kənarlaşdırıldı. Onu əvəzləyən isə tələbəsi, departamentin baş mütəxəssisi Firuz Abdulla oldu.
– Öncə saytımızın adından təbriklərimizi çatdıraraq yeni vəzifəyə təyinatla bağlı fikirlərini öyrənmək istərdik…
– Təbrikə görə minnətdaram. Mənə bu vəzifə AFFA rəhbərliyi, konkret baş katib tərəfindən təklif olundu. Mən də təklifi müsbət dəylərləndirdim. Uzun müddət, 2006-cı ildən həmin departamentdə baş mütəxəssis vəzifəsində çalışırdım. Təklif gəldi ki, departamenti rəisi vəzifəsində dəyişiklik olacaq və yeni rəhbər mən olum. Mən də müsbət qarşıladım. Hələ ki, müvəqqəti təyinatdı. Çalışacağam ki, göstərilən etimadı doğruldum. Bu etimadı göstərdiyinə görə rəhbərliyə təşəkkür edirəm.
– Hadisələrin belə tez cərəyan etməsi sənin üçün gözlənilməz olmadı ki?
– Əslində, hadisələr həddindən artıq, belə demək olarsa, ildırım sürətilə cərəyan etdi. Təkcə mənim üçün yox, görünür, mətbuat üçün də gözlənilməz oldu. Həyat elə gözlənilməzliklərlə doludu. Sağ olsunlar, yaxın dostlardan da təbrik edənlər var. Ümumiyyətlə, şəxsi tanışlığı olmayan insanlardan da təbriklər gəldi. Hamıya təşəkkür edirəm.
– Xələfinlə söhbətləşmək imkanın olubmu?
– Bu gün iş gününün sonunadək bir yerdə olmuşuq. Ünsiyyətimizdə, ümumiyyətlə, münasibətlərimizdə hər hansı problem yoxdu. Mənim bugünkü vəzifəyə təyinatımda da xüsusi canfəşanlığım olmayıb ki, onu həmin vəzifədən uzaqlaşdırsanlar, məni təyin etsinlər. O baxımdan fikirləşmirəm ki, aramızda hər hansı anlaşılmazlıq, fikir ayrılığı və ya narazılıq ola bilər. Güman edirəm ki, qarşı tərəfin də münasibəti belədi. Uzun illər ərzində birgə xeyli yol, məsafə qət etmişik. Keçən bütün günləri də böyük hörmətlə xatırlayıram. Özümün öhdəmə düşən, səlahiyyətim çatan qədər də Mikayıl Nərimanoğluya təşəkkür edirəm.
– Yeni vəzifəndə əsas məqsədin, vəzifən, iş prinsiplərin nə olacaq?
– Əslində, mənim üçün böyük ölçüdə ciddi dəyişiklik yoxdu. O baxımdan siz yaxşı bilirsiniz ki, uzun illərdi eyni sahədə işləyirəm. Böyük ölçüdə böyük dəyişiklərin olacağını gözləmirəm. Həmişə olduğu kimi, mətbuata qarşılıqlı yaxşı münasibətlərin formalaşması, media nümayəndələrini maraqlandıran sualları vaxtında, operativ cavablandırmaq, onların oyunlarda, məşqlərdə, təlim-məşq toplanışlarında rahat fəaliyyətinə yardım eləmək. Mətbuat xidməti əməkdaşı, rəhbəri, fərqi yoxdu, istənilən işçinin üzərinə düşən öhdəçilikləri yerinə yetirmək. Burada yenidən velosiped icad eləmək, kəşf eləmək fikrinə düşmək onsuz də əbəsdi. Hər şey bəllidi.
– Məlum olduğu kimi, Nərimanoğlu bu departametin rəhbəri olmaqla yanaşı, "Kəpəz"in Müşahidə Şurasının üzvü idi. Sənin də bu vəzifəyə təhkim olunmağın nəzərdə tutulub?
– Əslində, bu gün səhər Mikayıl müəllimin "Kəpəz"in Müşahidə Şurasının üzvlüyündən geri çağırılmasıyla bağlı rəsmi xəbər yayıldı. AFFA-dakı vəzifəsindən getməsiylə bağlı xəbər axşam saatlarında gəldi. "Kəpəz"dən ayrılmasıyla bağlı xəbər daha tez yayıldı. Bu, AFFA-nın rəsmi saytında oldu. Nərimanoğlunun "Kəpəz"dəki fəaliyyəti, hansı işləri görməsi nə mənim səlahiyyətdə deyil, nə də onun haqda bu qədər dəqiq, səlils informasiyam var.
– Belə deyək ki, eyni zamanda "Kəpəz"də fəaliyyətin nəzərdə tutulmayıb?
– Yox-yox, bu, öhdəlik deyil ki, yeni departament rəisi mütləq "Kəpəz"də də fəaliyyət göstərməlidi.
– Bəs "Səbail" necə olacaq? Məlumdur ki, bu klubda Müşahidə Şurasının üzvüsən. Üstəlik, AFFA yanında Media Komitəsində və Klublar Komitəsində koordinatorsan..
– Əslində, bu detallara yəqin ki, yaxın günlərdə, konkret olaraq sabah aydınlıq gələcək. Özünüz də qeyd etdiyiniz kimi, bütün məsələlər tez cərəyan elədi. Bunlar iş gününün sonuna təsadüf elədi. Xırdalıqları detallı şəkildə müzakirə eləməyə vaxtımız olmadı. Mənim düşüncəmə görə yəqin ki, komitələrdəki fəaliyyətimdən ayrlmalı olacağam.
– Ancaq "Səbail" məsələsi hələ ki, açıq qalır…
– Bəli. Bununla da bağlı tam dəqiq məlumat yoxdu. Sabah sizə məlumat verə bilərəm.
sport24.az
