İspaniya milli komandasının futbolçusu Fernando Torres 2012-ci il Avropa çempionatının ən yaxşı bombardiri olub. Korner.az-ın məlumatına görə, forvard turnirdə 3 qol və bir məhsuldar ötürmə ilə buna nail olub. Torreslə yanaşı Almaniya millisinin hücumçusu Mario Qomezdə 3 qol 1 ötürmə ilə yadda qalıb. Lakin almandan fərqli "Çelsi"nin forvardı meydanda daha az olub. Belə ki, Avro-2012-də 189 dəqiqə meydanda olan ispan hücumçunun rəqibində bu göstərici 282 olub.
Rusiyalı Alan Zaqoyev (253 dəqiqə), xorvatiyalı Mario Mancukiç (270 dəqiqə), italiyalı Mario Balotelli (420 dəqiqə) və portuqaliyalı Kriştianu Ronaldu (480 dəqiqə) də hərəyə 3 qol vurub. Çempionatın ən yaxşı məhsuldar ötürmə müəllifləri rusiyalı Andrey Arşavin, ingiltərəli Stiven Cerrard, ispaniyalı David Silva və almaniyalı Məsut Özildir. Onlar hərəyə 3 ötürmə veriblər.
Qeyd edək ki, 2012-ci il Avropa çempionatının qalibi adına finalda İtaliyanı 4:0 hesabı ilə məğlubiyyətə uğradan İspaniya yığması layiq görülüb.
