Sabiq FİFA referisi İmanxan Sultani Elçin Məmmədovun hakimlikdən uzaqlaşdırılmasına münasibət bildirib.
Korner.az-ın apasport.az-a istinaden məlumatına görə, İ.Sultani sabiq həmkarını "top"a tutub:
“Onsuz da Elçin Məmmədovun hakimlikdən uzaqlaşdırılacağını bilirdim. Sadəcə, geci-tezi vardı. Hava limanında gənc hakimləri aldadıb pullarını alan adamın hakimlik etməsi düzgün deyil.
Elçin dəfələrlə bildirmişdi ki, məni işdən çıxarsalar, Ramin Musayevlə Xaqani Məmmədov haqda faktlarım var, onları ortaya qoyacağam. Belə çıxır ki, onu qovmaq üçün Hafiz və Zeynal Məmmədov kimi sözükeçənlərin ortaya çıxmağı lazım imiş. Deməli, Elçinin Ramin Musayevlə hansısa işbirliyi vardı. Orduda cinayət işlətmiş, necə nəfəri aldatmış bir şəxsi gəlib yuxarı başda oturdublar. Televiziya verilişlərində AFFA-nın hüquq müdafiəçisi rolunda danışması, kimlərisə günahlandırılması ictimaiyyətdə özü haqda mənfi fikirlər formalaşdırmışdı”.
İmanxan Sultani Elçin Məmmədovla bağlı bunları dedi:
"Nə futbol oynamışdı, nə də hakimlikdən xəbəri vardı. Ona tapşırılan bir qrup gəncə bildiyi şəkildə dərs verdi. Elçin cari mövsümdə bir neçə kobud səhv etsə, qərarları kiminsə maraqlarına uyğun versə də, növbəti turda yenə təyinat alırdı. Hərçənd, başqa hakim bir səhvə görə kənarlaşdırırdılar. Guya Hakimlər Komitəsinin sədri Xaqani Məmmədov idi. Axı Xaqani kimdir? İclaslarda Elçin sədrdən betər danışırdı. Özü və yanına çəkdiyi 2-3 gənc hakim oyunlara başqalarından daha çox təyinat alırdı. Çünki hər şeyi əlinə almışdı, sözü keçirdi”.
