FIFA U-17 qadınlararası dünya çempionatı Azərbaycan 2012-nin Rəsmi Kuboku Sponsor Turuna davam edir. Korner.az-ın məlumatına görə, mükafat dünən DÇ-nin milli dəstəkçilərindən olan SOCAR-a təqdim edilib. SOCAR-ın inzibati binasında keçirilən rəsmi təqdimat mərasimində SOCAR-ın və Yerli Təşkilat Komitəsinin əməkdaşları iştirak ediblər.
SOCAR AFFA-nın da baş sponsorudur və Azərbaycanda futbolun inkişafına davamlı dəstək verir. Arzu edən hər kəs SOCAR-ın ofisində sərgilənəcək Kubokla şəkil çəkdirmək, FIFA U-17 qadınlararası dünya çempionatı Azərbaycan 2012-nin rəsmi talismanı Top Top Qız-ı görmək və burada yerləşdirilmiş məlumat lövhəsindən müvafiq məlumatlar əldə etmək imkanına malikdir.
Dünya kuboku SOCAR-ın ofisində sərgiləndikdən sonra, sentyabrın 2-də Bakcell-ə təqdim olunacaq. Sentyabrın 15-də isə Rəsmi Kubok Bakı şəhərinin Milli Parkında Kubok Turunun bağlanış konsertində şəhər əhalisinə təqdim olunacaq.
Qeyd edək ki, Rəsmi Kubok iyulun 6-da Beynəlxalq Muğam Mərkəzində keçirilən təntənəli püşkatma mərasimindən sonra FIFA tərəfindən Yerli Təşkilat Komitəsinə təqdim olunub. Rəsmi Kubok bir müddət AFFA-nın inzibati binasında sərgilənəndən sonra, avqustun 6-da Kubok Sponsor Turuna başlayıb. Sponsor Turu zamanı Rəsmi Kubok çempionatın milli dəstəkçiləri olan Xalq Bank və Paşa Sığorta şirkətlərinin ofislərində yerləşdirilmiş və beləliklə, geniş ictimaiyyətə təqdim olunmuşdu.
Avqustun 20-də Rəsmi Kubok ölkə Kubok Turuna başlayıb. Kubok turu çempionatın ev sahibi statusu daşıyan Lənkəran şəhərindən başlanğıcını götürərək, Gəncə və Sumqayıt şəhərlərindən keçməklə, Bakı şəhərinə qayıdıb. Qeyd olunmuş şəhərlərdə möhtəşəm konsert proqramı təqdim olunub və biletlərin satışı təşkil edilib.
affa.az
