Futbol

Dik Advokat rəsmən PSV-də

11.05.2012 , 06:35

Rusiya milli komandasının baş məşqçisi Dik Advokat Hollandiyanın PSV klubu ilə müqavilə bağlayıb. Korner.az-ın klubun rəsmi saytına istinadən verdiyi məlumata görə, hollandiyalı çalışdırıcı Rusiyadan yaxşı təklifi alsa da, vətəninə getməyi daha məqsədəuyğun hesab edib.

Dik Advokat Eyndhoven təmsilçisinə 2012-2013-cü il mövsümünün sonunadək rəhbərlik edəcək. Anlaşmanın şərtlərinə əsasən, 65 yaşlı baş məşqçi bir il ərzində özünə əvəzedici hazırlamalıdır. Advokatın gedişindən sonra isə komandanın sükanı arxasına köməkçilərindən Filip Koku və ya Ernest Faber keçəcək.

Qeyd edək ki, Dik Advokat 1995 – 1998-ci illərdə də PSV-nin baş məşqçisi olub. O, Rusiya yığmasını hazırkı anlaşmasının başa çatacağı iyulun 15-dən sonra tərk edə bilər. Advokatı millidə əvəzləməyə namizədlər qismində “Zenit”in baş məşqçisi Luçano Spaletti, Rusiyanın ikinci yığmasına rəhbərlik edən Yuri Krasnojan və gənclər millisinin sükanı arxasındakı Nikolay Pisarevin adı çəkilib. Rusiya millisi 2014-cü il dünya çempionatının seçmə mərhələsində Azərbaycanla eyni qrupda yer alıb.

Son yazılar

Yuxarı