Gürcüstandaki təlim-məşq toplanışını davam etdirən "İnter" ötən gün növbəti məşqlərinə çıxıb.
Korner.az-ın klubun rəsmi saytına istinadən verdiyi məlumata görə, səhər keçirilən məşqdə komanda sürprizlə üzləşib.
Belə ki, 2009-2011-ci illərdə "İnter"də çıxış etmiş gürcüstanlı yarımmüdafiəçi David Odikadze komandanın məşqinə baş çəkib. Uzun zaman görmədiyi keçmiş komanda yoldaşları ilə görüşən David, daha sonra klubun baş məşqçisi Kaxaber Sxadadze ilə söhbət edib.
Hazırda "Çixura Saçxere" klubunun formasını geyinən David Odikadze müsahibəsində bunları söyləyib:
"Uzun müddət "İnter"də birgə oynadığım komanda yoldaşlarımı görməmişəm. Məhz bu səbəbə görə "İnter"in məşqinə gəldim və uşaqlarla yenidən görüşdüm. "İnter" mənim karyeramda çox önəmli yer tutur, bu komandanın heyətində mən Azərbaycan çempionu və Birlik Kubokunun qalibi olmuşam.
Bu komandada unudulmaz illər keçirmişəm. "İnter"dən ayrılsam da, bu klubun mənim ürəyimdə xüsusi yeri var. Boş vaxtım olanda "İnter"in oyunlarını internet vasitəsi ilə izləyirəm, hazırki komandanın çox böyük potensialı var. Zənnimcə, "İnter" bu mövsüm çempionluq uğrunda mübarizə aparacaq. Çempionluq yolunda doğma komandama uğurlar arzulayıram".
