“Daha ciddi oynamalıyıq” – Qurban Qurbanov
28.02.2022 , 22:34
“İntizamlı və istəkli komandaya qarşı oynayırdıq. Kubokun cavab oyunundan sonra da demişdim ki, hesab bizi aldatmamalıdır”.
Korner.az xəbər verir ki, bu sözlər “Qarabağ”ın baş məşqçisi Qurban Qurbanov Azərbaycan Premyer Liqasının 17-ci turunda “Keşlə” ilə keçirilən görüşdən sonra mətbuat konfransında deyib.
O, matçı belə şərh edib: “Bu komanda bizə qarşı ciddi hazırlaşır. Çempionatın ilk oyununda burada bərabərliyə qalmışdıq. Bəzi futbolçular çoxdandır ki, 90 dəqiqə oynamırdılar. Çatışmazlıqlar hiss olunurdu. Əziyyət çəkdilər, çox istəkliydilər. Bu oyun bir daha göstərdi ki, daha ciddi və daha istəkli oynamalıyıq. “Keşlə”yə uğurlar arzulayıram”.
Bu gün daha çox yerli futbolçulara şans verən Qurban Qurbanov bundan sonra da bu cür seçim edəcəyini bildirib: “Özlərindən asılıdır. Hər zaman çalışırıq ki, şans yaradaq hamıya. Daha çox birlikdə oynamalıdırlar, oyun təcrübələri çox olmalıdır. Qarşıdakı oyunlarda da onları yenidən meydanda görə bilərik. Hər şey özlərindən asılıdır”.
