“Arxada qoyduğumuz il mənim üçün həyatımın ən uğurlu ili oldu. Əsas komandada debüt etdim, bir çox vacib oyunlarda meydançada yer aldım. Necə deyərlər, həyatımın 21-ci ili yeniliklərlə, maraqlı hadisələrlə zəngin oldu”.
Korner.az-ın məlumatına görə, bu sözləri yanvarın 15-də “Qəbələ”nin Antalya düşərgəsində ad gününü – 21 yaşını qeyd edən Müşfiq Teymurov deyib.
Komandanın dünənki səhər məşqində baş məşqçi Yuri Syomin və komanda yoldaşlarının təbriklərini qəbul edən gənc müdafiəçi klubun rəsmi saytına açıqlamasında futbolla bağlı arzularından və hədəflərindən danışıb. O, başlıca məqsədinin milli komandanın heyətində yer almaq olduğunu söyləyib: “Gəncəm, deyərdim ki, peşəkar futbol həyatımda hər şey yeni başlayır. Arzularım çoxdu. Ən əsası yaxşı və stabil oyun göstərib komandamın heyətində möhkəmlənməliyəm. Artıq illərdi ki, “Qəbələ”dəyəm. Bütün futbol həyatım “Qəbələ” ilə bağlıdı. Bu komanda mənə çox doğmadı. İstərdim ki, karyeramı da “Qəbələ”də bitirim. Əsas hədəfim milli komandanın heyətinə cəlb olunmaqdı. Amma bunun üçün çox çalışmalıyam, özümü sübut etməliyəm. İnanıram ki, bu missiyanın öhdəsindən gələcəyəm”.
