"Millinin yeni baş məçqçisi Berti Foqtsdan köklü şəkildə fərqlənir. Məşqlərinə fikir vermisizsə, bu məşqçinin komandanı müdafiədən oynatmaq fikri yoxdur. Məşqin gedişində verdiyi tapşırıqlardan hiss olunur ki, istər standart, istərsə də mərkəzdən hücumlara geniş yer verir. Və futbolçuları daim xoşbəxtliyi rəqib qapısı qarşısında axtarmağa çağırır. Buna görə də, hesab edirəm ki, azərbaycanlı azarkeşlər bu il uzun müddətdən sonra milli komandanın ifasında, nəhayət, hücum futbolu görəcək. Robert Prosineçki bu qaydada davam edərsə, komanda böyük uğurlar qazanacaq".
Korner.az-ın məlumatına görə, bu sözləri Antalyada millinin bugünkü məşqini izləyən Məşqçilər Komitəsinin üzvü Böyükağa Hacıyev deyib.
Hacıyev ona ünvanlanan "Bəs komanda hazırdırmı Prosineçkinin bu fəlsəfəsini meydanda tətbiq etməyə?" sualına belə cavab verib: "Təbii ki, zamana ehtiyac var. Prosineçki toplanışın ilk günündən çalışır ki, özünün futbol fəlsəfəsini komandaya tez bir zamanda aşılaya bilsin. Və çox güman ki, buna nail olacaq. Bundan başqa, Prosineçkinin gətirdiyi fiziki hazırlıq üzrə məşqçinin işi daha sağlamdır. Yəni əvvəlki məşqçilərdən fərqli olaraq, modern fiziki hazırlığa bir o qədər də fikir vermir. Bütün düşüncəsi komandanı məşqə düzgün hazırlamaqdır. Digər tərəfdən, Prosineçkinin komandanı texniki-taktiki planda "işlətməsi" hər şeydən xəbər verir".