“Komandanı təhvil aldığın 4-5 gündə məşqləri davam etdiririk. İstəyimizə müəyyən mənada nail olmuşuq. Komanda öz əvvəlki oyununu bərpa edir”.
Korner.az-ın məlumatına görə, bu sözləri “Neftçi”nin baş məşqçisi Böyükağa Hacıyev deyib.
Albaniyanın “Partizani” klubu ilə oyundan sonra danışan baş məşqçi əsas diqqəti hücum xəttinə yönəltdiklərini bildirib: “Daha çox hücum xətti üzərində çalışmalar fikir veririk. Mənə elə gəlir ki, komanda mövsümün ikinci yarısına hardasa 40-45 faiz hazırdı. Gələn həftədən hazırlığın növbəti mərhələsinə başlayacağıq”.
Hacıyev “Neftçi”nin yeni transferə ehtiyacının olmadığını bildirib: “Komandada yetərincə futbolçu var. İkinci qolu vuran Samir Məsimovun cəmi 18 yaşı var. Bu gün belə gənclərimiz varsa, onlara ümidlər bəsləyiriksə, niyə transferlər edək?”.
“Neftçi”nin baş məşqçisi oyunu birlikdə izlədiyi Berti Foqtsla qardaş olduğunu bildirib. Bir müddət əvvəl isə o, alman məşqçini tənqid edir və yığmada oondan daha yaxşı nəticə verəcəyini deyirdi: “Mən yenə deyirəm ki, milliyə gəlsəm, daha yaxşı komanda quraram. Heç nə dəyişməyib. Foqtsla atəşkəs elan eləmişik və qardaşlaşmışıq. Foqts nə qədər qalib gələcəksə, mən onu dəstəkləyəcəm. Uduzsa, başlayacağam”.
