"Birinci hissədə çox sayda qol imkanlarını boşuna xərclədik. İkinci yarıda isə "vurmayana vurarlar" prinsipi sözünü dedi. Son 15 dəqiqədə hiss etdim ki, üstünlük rəqibə keçir. Elə həmin dəqiqələrdə də qol buraxdıq və heç nədən 2 xal itirdik".
Korner.az-ın məlumatına görə, bu sözləri Premyer Liqanın 1-ci turundan təxirə salınmış "Neftçi" – "Bakı" oyunundan sonra meydan sahibi komandanın çalışdırıcısı Böyükağa Hacıyev deyib.
Heç bir futbolçusundan razı qalmadığını qeyd edən Hacıyev legionerlərindən şikayətlənib: "Dekabrın 25-ə az vaxt qalıb. Legionerlərimiz "çemodan əhvalı"ndadılar. Onları oyuna kökləmək çox çətindi, ancaq yolunu tapacağıq. Etiraf etməliyik ki, Cavid formada deyil. Onun əvəzinə Mirhüseyni buraxırıq, o da Caviddən zəif".
"Ağ-qaralar"ın çalışdırıcısı Mahir Şükürovun ehtiyatda saxlanılmasının səbəbini də açıqlayıb: "Onu Lənkərandakı zəif oyununa görə ehtiyatda oturtmuşdum. Saşa Stamenkoviçin alternativi olsaydı, onu da dünəndən ehtiyata göndərərdim".
