“Xəzər Lənkəran” noyabrın 24-də Lənkəranda keçirilməsi nəzərdə tutulan “Neftçi” ilə Premyer Liqanın 13-cü turunun oyunun məkanını dəyişmək istəyir.
Korner.az Qol.az-a istinadən xəbər verir ki, cənub təmsilçisi Lənkəran stadionunun ot örtüyünün dəyişdirilməsi ilə əlaqədar bu qarşılaşmanın Bakıda keçirilməsi üçün “Neftçi”yə müraciət edib. Müraciətdə meydan sahibi rolunda “Neftçi”nin çıxış etməsi istənilib.
Qeyd edək ki, bu komandalar arasındakı birinci dövrədəki ilk oyunda meydan sahibi tərəf “Neftçi” olub. Əgər paytaxt təmsilçisi “Xəzər Lənkəran”ın müraciətinə müsbət cavab verərsə, bu halda növbəti oyunda da meydan sahibi olacaq.
Ona görə də Premyer Liqanın 3 və 4-cü dövrəsində bu komandalar arasındakı görüşlərdə “Neftçi” qonaq qismində çıxış edəcək və hər iki oyun Lənkəranda keçiriləcək.
“Xəzər Lənkəran”ın mətbuat xidmətinin rəhbəri Hüseyn Cəbrayıloğlu Qol.Az saytına açıqlamasında məlumatı təsdiqləyib. O bildirib ki, hələlik müraciətlərinə “Neftçi” klubundan cavab verilməyib.
