Azərbaycan millisinin baş məşqçisi Berti Foqts bu gün mətbuat konfransı keçirib. Korner.az-ın məlumatına görə, almaniyalı mütəxəssis öncə Bəhreynlə sabah baş tutacaq yoldaşlıq görüşünə hazırlıq haqda danışıb.
– Hazırlıq haqda nəsə demək çətindir. Bu, rəsmi oyun öncəsi son sınaqdır. Çox şadıq ki, ələ belə bir fürsət düşüb. Bəhreynlə İsrail yığmaları səviyyəcə eyni olmasalar da, bu matçın keçirilməyi yaxşıdır. Məşq prosesindən razı qalmışam. Hava şəraiti çətinlik yaradır, çünki çox istidir. Buna görə niyə sabah saat 6-da oynayacağımı başa düşə bilmirəm. Bu heyətlə və sonradan bizə qoşulacaq bir neçə futbolçu ilə İsrail və Portuqaliyaya qarşı oynayacağıq. Həmin qarşılaşmalara yeni futbolçu götürməyəcəyik.
– Bəhreyn yığması süni örtüklü meydanda oynamaq istəmədiyi üçün stadion dəyişdirildi. Təcrübəli mütəxəssis kimi buna münasibətiniz necədir?
– Şəxsi fikrim belədir ki, bir futbolçu həvəslə təbii otda oynayırsa, süni meydançada da oynamalıdır. Ancaq İngiltərədə də belə qazonlar hazırlanır. Çünki hava şəraiti nəzərə alınır. Süni meydançada gözəl futbol oynamaq olmur. Biz Bəhreynə süni meydançada saat 21:00-da oynayacağımız demişdik. Başa düşmürəm, niyə oyuna 2 həftə qalmış bundan narazı qalıb, stadionun dəyişdirilməyini istədilər.
– Millinin bir sıra futbolçuları, o cümlədənŞ qapıçı Kamran Ağayev transferə çıxarılıb. Bu haqda düşünürsünüz?
– Bunu futbolçuların özlərindən soruşun. Məncə, bir səhvə görə müqaviləsi olan futbolçunu qovmaq düzgün deyil. Bu hüququ onlara heç kim vermir. Hamımız səhv edə bilərik. Futbolçu səhv edibsə, onu cərimələmək olar. Futbolçunu səhvə görə klubdan qovmaqla, heç vaxt razı olmaram.
– Rail Məlikov haqda da eyni fikirdəsiniz?
– Bu, bütün futbolçulara aiddir. Əgər mənim işçim olsaydınız, sizi səhvə görə çıxarmaram. Səhv edən insanla 2 ay öncə müqaviləni uzatmaram. Mahir Şükürovla bağlı vəziyyət fərqli idi. Kamran və Raillə avrokubok oyunlarındakı səhvlərə görə müqavilələr pozulub. “Neftçi”nin “Qarabağ” və “Hapoel”lə oyunlarını göstərir ki, hücumda problemlər hiss olunur. Çünki onlar bu qərarlardan sonra səhv etməyə qorxurlar. Qorxa-qorxa isə futbol oynamaq olmaz.
– Kamranın xarakterində də problemlər var. Siz 90-cı illərin əvvəlində Ştefan Effenberqi Almaniya yığmasından buna görə kənarlaşdırmısınız. Hesab etmirsiniz ki, belə futbolçulara qarşı belə tədbirlər görülməlidir?
– Bu, 1994-cü ildə olub, yaxşı yadımdadır. Mən onu qovmazdan öncə 3 dəfə xəbərdarlıq edib, sonra evə göndərmişəm. Ştefanın mənim haqqımda müsahibəsini jurnalistlər özündən çıxarıb. Onun qovmağının səbəbi azarkeşlərə barmağını göstərməyi oldu. Azarkeşlərə qarşı belə hərəkət düzgün deyil. Ona dedim ki, get, azarkeşlərdən üzr istə. Ancaq etmədi. Effenberq 4 il sonra bunu edərək, yığmaya qayıtdı.
– Siz azərbaycanlı futbolçulardan xarakterinə, peşəkarlığına görə kimləri bəyənirsiniz?
– Konkret ad çəkməyəcəyəm. Mənim üçün əsas komandadır. Çünki futbol komanda idman növüdür. Ona görə ad çəkməyi xoşlamıram. 11 futbolçu qalib gəlməyə çalışmalıdır. Eqoist adama futbol oynamaq çətindir. Futbol çox çətin bir idman növüdür. Güləş ondan asandır.
– Sizcə, müdafiənin mərkəzində də problemlər var?
– Sizinlə razıyam. Avqustun 28-də başlayacaq İsraillə oyun öncəsi məşqlərdə bunun üzərində çox çalışacağıq.
– Cavid Hüseynovun müəyyən fasilədən sonra yığmaya qaytarmağınız nə ilə bağlıdır? Bununla digər futbolçulara demək istəyirsiniz ki, Cavid Türkiyədə, xaricdə oynayır?
– Dedikləriniz tam səhvdir. Mən Cavidin oyununu bir neçə aydır görmürəm. İndi onun hansı səviyyədə olduğunu görmək istəyirəm. Bunu özüm istəmişəm. Bu, təkcə Cavidə yox, bütün futbolçulara aiddir ki, həmişə onları yoxlamaq istəyirik. Futbolçu xaricdə oynayanda, özünəinamı güclü olur. Mən Almaniya yığmasını rəhbərlik edəndə 9 futbolçumuz İtaliyada oynayırdı. Onlarda özünəinam hiss olunurdu. Hazırda bir sıra futbolçularımız xaricdə oynayır. Bu, çox yaxşıdır. Dağıstanda anadan olan 2 futbolçu milli komandada oynamağa görə pul istəmişdi. Bununla razılaşmayıb, imkan verməmişdim. Azərbaycanlı futbolçular burda yaxşı qazandıqlarından, xaricə getmək istəmirlər. Deyirlər ki, elə evimdə oturub, yaxşı pul qazanıram. Elə futbolçu var ki, milliyə qayıtmaq üçün icarədə oynadığı komandadan müqavilə ilə məxsus olduğu klubuna qayıdır. Ancaq baş məşqçi 2 turdur onu meydana buraxmır. Sizcə, bu, düzgündür? Mən həmin baş məşqçiyə zəng edib, bunu soruşmuşdum. Həmin futbolçunun adını çəkməyəcəyəm. O, az pula başqa klubda oynayırdı.
apasport.az
