Hazırda “Simurq” klubunun vəziyyəti, həqiqətən də, çox ağırdır. Maliyyə problemləri səbəbindən komandanın çempionatdakı çıxışını davam etdirməsi sual altındadır. Futbolçuların Premyer Liqanın 32-ci turu çərçivəsində keçirilən “İnter”lə qarşılaşmadan əvvəl yerə diz çökərək mövcud vəziyyətə etirazını bildirməsi futbol ictimaiyyətində böyük əks-səda doğurdu. Bəziləri bunu oyunçuların kluba sədaqətsizlik nümayiş etdirməsi kimi yanaşdısa, bir qisim də futbolçuların akisyasına dəstək verdi. Məsələ ilə bağlı “Simurq” klubunun qocaman azarkeşi, fanklub rəhbərlərindən biri İnqilab Soltanovla əlaqə saxlayıb,fikirlərini öyrəndik:
“Hər şey göz qabağındadır. Artıq danışası heç nə qalmayıb. Futbolçular da öz etirazlarını bildirdilər Əslində, dəstək olunası hal idi. İndi mən elə vəziyyətdəyəm ki, heç danışa da bilmirəm. Bütün bu baş verənlərdən sonra artıq futbola nifrət edirəm. Biz stadiona sadəcə olaraq futbolçuların xətrinə gəlirik. Sabahımızın nə olacağı da bilinmir. Təkcə maliyyə problemləri yox, burda AFFA-nın da günahı var, bizi elə bu günə salan da onlardır. Bu cür klubu məhv etdilər. Ümumiyyətlə, Azərbaycanda futbolun olması onlar üçün maraqlı deyil. Nə maliyyə dəstəyi? Yalan olmasın, 2004-cü ildən 15-16 klub dağılıb. Əsasən bölgə klubları. Amma Bakıda klublar günü-gündən artır. Bu, faktiki olaraq, Bakı çempionatdır, adının “Azərbaycan Premyer Liqası” olması isə formal xarakter daşıyır. Bölgə klubları çox pis vəziyyətdir. Hamısı cənab Prezident İlham Əliyevi aldadır, onun gördüyü əziyyəti yerə vururlar. Bilirsiz, Azərbaycanda futbola aid hər şey var, amma onun özü, oynayanı yoxdur. Bura böyük pullar buraxılır, amma keyfiyyət yoxdur. Biz bundan sonra nə edəcəyiksə, “Simurq”lu futbolçuların xətrinə edəcəyik, söz verdilər ki, oyuna çıxacağıq və sözlərinin üstündə durdular. Artıq çempionata maraq yox səviyyəsindədir, azarkeşlərə belə Premyer Liqa lazım deyil. “Simurq”un “Bakı” kimi, “Sumqayıt” kimi, AZAL kimi olmasını istəmirəm. Azərbaycan təkcə Bakıdan ibarət deyil. Burda 120 min əhalisi olan Zaqatalanı bilərəkdən məhv elədilər. Böyük büdcəsi olan, arxasında böyük pullar dayanan klubları aparırlar avrokuboklara, qalanları isə… “Simurq” kasıb klubdur, ona görə belə münasibət görür. Onun vəziyyəti heç kimə maraqlı deyil. Hamısı yalan şeylərdir, nə bilim, “Azərbaycanda futbol inkişaf edir”. Kim onu deyirsə, mən o insanla üz-üzə gəlməyə hazıram. Əgər bizim futbolumuz Malta, Tacikistan, Qırğızıstan, Lüksemburq, Lixtenşteyn səviyyəsindədirsə, nəyi qoyub, nəyi axtarırıq? Malta üzərində qələbəyə görə, 10 min dollara yaxın mükafat verildi. Belə futbol bəlkə də dünyanın heç bir yerində yoxdur. 9 klub var, faktiki olaraq 9 yox, 4-dür. Qalanlar ad olsun deyə, meydana çıxırlar. Belə maraqsız çempionat mən ömrümdə görməmişəm. Dünyanın heç bir yerində bu cür şeylər yoxdur. Demək olar ki, 3-4 dənə derbi adlanan oyun var, hamısı da Bakıda baş tutur. AZAL- “Neftçi” derbi, “İnter”- “Bakı” derbi. Bunlar hamısı dırnaqarası derbilərdir. Derbi sözünün mənasını çox təəssüf ki, biz bilmirik. Futbolumuzu şişirdirik, yalandan deyirik ki, “Azərbaycanda futbol var”. Bu ölkədə futbol adına heç nə yoxdur. Futbolun başında duranlar, onu idarə edənlər də yox kimidirlər. Futbolumuzun vəziyyəti elə bu cür də davam edəcək. Hələ 50 il ölkəmizdə futbol olmayacaq”.
Ürfan Məmmədzadə
