“Komanda olaraq yaxşı müdafiə olunduq, topla yaxşı oynadıq. “Qəbələ” ilə oyundan sonra demişdim ki, Kiyevə məğlub olmağa getməyəcəyik. Biz, ümumiyyətlə, heç bir səfər oyununa məğlub olmağa getmirik”.
Korner.az-ın məlumatına görə, bu sözləri “Qarabağ” klubunun makedoniyalı futbolçusu Muarem Muarem komandasının Avropa Liqasının qrup mərhələsi çərçivəsində bu gecə “Dnepr” (Ukrayna) üzərində qələbəsini şərh edərkən deyib.
Vurduğu qolla təmsilçimizə tarixi qələbə qazandıran yarımmüdafiəçi ilkə imza atmasından məmnunluğunu ifadə edib: “Bizə bu cür səfər qələbəsi növbəti oyunlara daha yaxşı hazırlaşmaq üçün vacib idi. Azərbaycan klubları içərisində qrup mərhələsində ilk qələbə qazanan komanda olmaq, komandama bu zəfəri qazandıran qolu vurmaq təbii ki, məni sevindirir. Ancaq bu qələbədə hamının payı var. Allah bütün komanda yoldaşlarımdan razı olsun. İnşallah, davamı gələcək. Qrupdan çıxmaq haqda danışmaq üçün hələ ki tezdir. Qarşıda 3 oyunumuz var. İnşallah, bu işin öhdəsindən gələcəyik”.
Muarem tribunada azərbaycanlı azarkeşləri görüncə təəccübləndiyini də söyləyib: “Açığı, bizi dəstəkləmək üçün bu qədər azarkeşin gələcəyini gözləmirdim. Demək olar ki, bütün tribunalarda azarkeşlərimiz vardı. Həqiqətən, qürurverici idi. Sanki öz meydanımızda oynayırdıq. Ev oyunlarında azarkeş sarıdan problemimiz olmurdu, ancaq səfər matçında bu qədər dəstəkçimizin olacağını gözləmirdim. Orada “Qarabağ” və “Azərbaycan” şüarlarını eşitmək çox gözəl hiss idi”.
