“Hazırlıq prosesi çox yaxşı və intensiv şəkildə gedir. Hətta, bugünkü oyundan əvvəl də məşqimiz olmuşdu. Ona görə də bu oyunda futbolçularım yorğun görünürdü. Bizim üçün belə qarşılaşmalarda nəticə əsas deyil. Çalışırıq ki, bütün futbolçulara şans verək”.
Korner.az-ın məlumatına görə, bu sözləri “Hajer”lə oyundan sonra “Neftçi”nin baş məşqçisi Arif Əsədov jurnalistlərə açıqlamasında deyib.
Əsədov qış toplanışından əvvəl komandadan göndərilən Elnur Allahverdiyevin məsələsinə də aydınlıq gətirib: “Bruno Bertuççi getdikdən sonra müdafiənin sol cinahında boşluq var idi. O cinahda oynaya biləcək yerli futbolçumuz az olduğundan Elnuru komandaya kömək etməsi üçün gətirmişdik. Bir çox oyunlarda bizə çox yararlı olsa da, sonradan intizamsızlıq etməyə başladı. “Xəzər Lənkaran”la oyunda qırmızı vərəqə alması isə bizim üçün artıq hər şeyi aydınlaşdırdı və komandadan göndərildi. Onun transfer vərəqini vermişik və Antalyaya gəlməmişdən əvvəl dedik ki, artıq özü üçün komanda axtara bilər.
Çalışdırıcı komandanın yeni transferi Rauf Əliyevin keçidinə də münasibət bildirib: “Rauf bugünkü oyunda özünü doğrultdu. O, “Xəzər Lənkaran”da oynayanda az qol vurmuşdu. Biz onunla söhbət etdik ki, ilk oyunlardan yaxşı oynayıb inam qazanmalıdır”.
Rəhman Hacıyevin Türkiyədən deportasiya olunması səbəbilə Türkiyə toplanışına qoşula bilmədiyini söyləyən Əsədov türk menecerlərin hədəfində olan Samir Məsimovla bağlı fikirlərini belə bildirib: “Biz həmişə demişik ki, qapımız hər kəsə açıqdı. Xüsusən də gənc futbolçulara yaxşı klublardan dəvət olarsa, yollarını kəsmərik. Bu məsələ ilə bağlı heç nə deyə bilmərəm. Çünki real heç nə yoxdur. Amma mənə elə gəlir ki, Samir “Adana Dəmirspor”dan daha yaxşı komandalara layiqdir”.
