Avropa Liqasının qrup mərhələsi çərçivəsində keçirilən “Qarabağ” – “İnter” matçının son saniyələrində vurulan qolun qeydə alınmaması hələ də müzakirə olunur. Qaldırılan bir bayraq, yüz minlərlə insanın ciddi etirazına və qəzəbinə səbəb oldu. Bəs FİFA hakimimiz Anar Salmanov nə düşünür qərarla bağlı?
– Hakimin iki kobud səhvi “Qarabağ”ın əziyyətini yerə vurdu. Orda ofsayddan söhbət belə gedə bilməz. Çox güman ki, laynsman orda Leroy Corcun guya qapıçıya mane olduğunu əsas tutaraq belə bir qərar qəbul etdi, bayrağı qaldırdı. Halbuki, orda açıq-aydın görünür ki, top “İnter”in futbolçusuna dəyərək qapıdan keçir. Qapı arxasında duran hakim bunu görürdü və mən inanmıram ki, baş hakimə bu haqda məlumat verməsin.
– Zelinka ilə bağlı nə qərar verilə bilər?
– Əgər bu qərar hakim-inspektor tərəfindən oyun nəticəsinə birbaşa təsir edən səhv kimi qiymətləndirilərsə, hakim çox aşağı qiymət alacaq. Bu isə o deməkdir ki, ən azı 6 ay müddətinə UEFA bayrağı altında keçirilən yarışlara təyinat almayacaq.
– Siz heç kimlik karyeranz ərzində belə bir halla üzləşsinizmi?
– Xeyr. Bu çox gülünc epizod idi. Mən sizə deyim, belə səhvləri görəndə “sağ olsun Azərbaycan hakimliyi” deyirik. İnandırım sizi, bizimkilər qat-qat üstündür onlardan. Bizdə heç Birinci Divizion hakimləri belə səhv etmirlər. “Qarabağ”ın mübarizəni erkən dayandımasının günahı bilavasitə baş hakimin boynundadır. Mənə elə gəlir ki, o, həmin vəziyyətdə məsuliyyəti öz üzərinə götürməli idi. Köməkçi hakimlərlə qulaqcıq vasitəsilə danışıb, qolu saya bilərdi.
– Oyunun yenidən keçirilməsi nə dərəcədə realdır?
– Mən belə bir halla qarşılaşmamışam. Heç-heçə qurtarıbsa, oyundankənar vəziyyətə görə nəticə ləğv oluna bilməz. Mən bunu mümkün hesab etmirəm. O qədər səhvlər olur ki.
– Keçən il baş tutmuş “Kasımpaşa”-“Beşiktaş” matçında hücum zamanı meydançaya ikinci top atılmasına görə,oyun yenidən təkrarlanmışdı. İki hadisə arasında paralellər aparmaq nə dərəcədə düzgündür?
– Həmin hadisə Türkiyə çempionatında baş vermişdi. Bu isə Avroliqadır. Nəzərdə tutduğunuz epizod yadımdadır. Stadiona ikinci top atılmışdı. Onların reqlamentlərində belə hallar nəzərə alınır. Təəssüf ki, UEFA belə məsələlərə biganə yanaşır. İnanmıram ki,nüfuzlarına xələl gətirəcək qərar qəbul etsinlər.
Ürfan Məmməd
