"Bakı" – "Xəzər Lənkəran" oyununu birincilərin 10 oyunluq cəzalı vitse-prezidenti Zeynal Məmmədovun VİP lojada izləməsi cəzasız qaldı. Səbəb kimi isə o göstərildi ki, bu barədə hakim-inpektorun, yaxud AFFA nümayəndəsinin raportunda heç bir qeyd yoxdu. Dünən oyunun hakim-inspektoru olmuş Xaqani Məmmədovla danışmışdıq. Məmmədov soyadaşının VİP-də 10 dəqiqə oturduğunu söyləmişdi. Hərçənd, Zeynal bəyin qarşılaşmanın ilk 45 dəqiqəsini ordan izlədiyinin şahidi özümüz olmuşduq. Xaqani bəy onu da əlavə etmişdi ki, AFFA nümayəndəsinə Zeynal bəyin orda oturduğunu deməyib. Bəs Həmidov nə deyir? Həmidov isə deyir ki, korner.az-ın baş redaktoru onu bu barədə məlumatlandırdıqdan sonra Xaqani Məmmədovdan belə bir şeyin olub-olmadığını soruşub. Xaqani Məmmədov nə cavab verib? Oxuyun…
– "Bakı" – "Xəzər Lənkəran" matçında Saleh sizə (Korner.az saytının baş redaktoru) yaxınlaşmışdı ki, Zeynal müəllim (sözümü yarımçıq kəsir)
– Ay sənə qurban olum, vicdanım haqqı, Zeynal müəllimi görməmişəm. Mən iki dəfə Yaşar müəllimi görmüşəm və ona yaxınlaşıb demişəm ki, burada görünməyin. Yaşar müəllim də deyib, baş üstə, vəssalam, çıxıb gedib. Çünki cəzalanan şəxslər orda olmamalıdı. Bundan sonra Saleh mənə yaxınlaşdı və Zeynal müəllimin VİP lojada oturduğunu dedi. Mən hər kəsin dalınca düşəsi deyiləm ki? Mən bütün oyunu meydançada olmuşam, dördüncü hakimlərlə birgə. Mən indi orda kiminsə dalınca qaçası deyiləm ki?
– Axı sizə deyiləndə ki, Zeynal müəllim VİP lojada oyunu izləyir, siz demisiz ki, oranın bizə aidiyyəti yoxdu.
– Mən elə deməmişəm. Deməmişəm ki, oranın bizə aidiyyəti yoxdu. Mən kiminsə dalıca qaçası deyiləm ki? Adamı peşman edirsiz sizinlə danışmağa. Gözəl oyun keçdi, amma siz düşmüsüz belə şeyin üstünə. Qaşınmayan yerdən qan çıxarmaq istəyirsiz.
– Siz bunu raportda qeyd etmisizmi?
– Qeyd etməmişəm. Görmədiyim şeyi necə qeyd edim?
– Axı sizə deyildi ordadı?
– Mən çıxdım Salehin dediyi yerə. Gördüm Xaqani müəllim ordadı. Ondan soruşdum ki, Xaqani müəllim, Zeynal müəllim burdadı? Dedi ki, yox.
– Biz dünən Xaqani müəllimlə də danışdıq. Özü də təsdiqlədi ki, Zeynal məllimlə oyunun ilk 10 dəqiqəsini izləmişəm… (sözümü kəsir)
– Bəs mən Xaqani müəllimdən soruşanda dedi ki, yox?! Mən ondan soruşdum ki, Zeynal müəllim burdadı, görmüsüz? Dedi, yox.
– Xaqani müəllim sizə demədi ki, Zeynal müəllim burda olub?
– Yox. Mən ondan soruşanda dedi ki, burda olmayıb.
Səxavət Qurbanov
