Bu gün ölkənin idman mətbuatında nüfuz sahibi olan, son illər mediadan uzaqlaşsa da, mediatikliyini itirməyən Altay Əliyevin ad günüdür. 1978-ci il may ayının 14-də Ağdam şəhərində anadan olan həmkarımız 1994-cü ildə Bakı Sosial İdarəetmə və Politologiya İnstitutunun "Beynəlxalq münasibətlər" fakultəsinə daxil olub. 1998-ci ildə bakalavr dərəcəsini bitirən A.Əliyev 2000-ci ildə Prezident yanında Dövlət İdarəçilik Akademiyasının "Dünya siyasəti və beynəlxalq münasibətlər" ixtisası üzrə magistr təhsilini alıb.
Jurnalist fəaliyyətinə 1995-ci ildə "525-ci qəzet"də başlayıb. Bir il sonra AzTV-yə keçib və 14 il dövlət televiziyasında çalışıb. 2002-ci ildə ATV-də fəaliyyət göstərən həmkarımız bir sıra tarixi uğur qazandığımız oyunları – "Neftçi"nin 2006-cı ildə "MDB və Baltikyanı ölkələrin çempionlarının Birlik Kuboku"nun finalında Litva "Kaunas"ını 4:2, həmin il UEFA Çempionlar Liqasında Belçika "Anderlext"ini 1:0, "Qarabağ"ın 2009-cu ildə Avropa Liqasında Norveç "Rusenborq"u və Finlandiya "Honka"sı üzərində 1:0 və 2:1 hesablı qələbələr qazandığı qarşılaşmaları, eləcə də 2010-cu il dünya çempionatının seçmə qrup mərhələsində Azərbaycan yığmasının Rusiya ilə 1:1 hesabı ilə nəticələnən görüşünü – televiziya vasitəsilə canlı şərh edib.
Mətbuatdan ayrıldıqdan sonra “TopAz”da işə başlayan A.Əliyev bu günlərdə fəaliyyətə başlayan NETBET şirkətinin baş direktoru təyin edilib.
Korner.az-ın kollektivi olaraq dəyərli həmkarımızı və dostumuzu doğum günü münasibəti ilə təbrik edir, uzun ömür, cansağlığı, üzərinə götürdüyü ağır və məsuliyyətli işində yeni-yeni uğurlar arzulayırıq!
