“Səmimi deyirəm: “Xəzər Lənkəran”ın I diviziona enəcəyi halda, bunu çox pis qarşılayaram”.
Korner.az-ın Sportnet.az-a istinadən yaydığı xəbərə görə, bu sözləri Peşəkar Futbol Liqasının prezidenti Ramin Musayev deyib.
O bildirib ki, Lənkəran komandası Premyer Liqaya gəldiyi gündən çempionata maraq yaradıb:
“Hansısa komanda Premyer Liqadan düşsəydi, mənə təsir etməzdi, nəinki “Xəzər Lənkəran. Çünki bu komanda gəldiyi gündən Premyer Liqaya maraq yaradıb. Getməyinə üzülərəm. Mayın 20-də “Xəzər Lənkəran”ın “Rəvan”la səfər oyunu var. Hansısa komandanın udub-uduzmasını mən təşkil etmirəm. Onu özləri təşkil edirlər. “Xəzər Lənkəran” “Sumqayıt”ı udurdu, hesabı qoruya bilərdi. Bəlkə gücünü “Rəvan”la oyuna saxladı? “Rəvan” “Qarabağ”ı necə udubsa, bacarığı, imkanı varsa, “Xəzər Lənkəran”ı da udsun. Mən buna heç nə edə bilmərəm. Lakin bir futbol adamı kimi “Xəzər Lənkəran”ın I Diviziona düşməsinə üzülərəm. Bu, mənim şəxsi münasibətimdir”.
Qeyd edək ki, “Xəzər Lənkəran” XXXV turdan sonra 14 xalla sonuncu pillədədir. Klub sonuncu pillədən qurtulmaq üçün axırıncı turda “Rəvan”ı yenməlidir.
