Bu gün “Avey” idman klubunun təqdimat mərasimi keçirilib.
Korner.az-ın məlumatına görə, tədbirdə çıxış edən klubun prezidenti Arzuman Abdülkərimov gələcək planları haqda danışıb.
“Avey” idman klubu bir neçə ildir fəaliyyət göstərir. Lakin daha öncə Qazax Olimp klubu adı ilə çıxış etmişik. İndiyə qədər bir çox beynəlxalq yarışların iştirakçısı olmuşuq. Bölgələrdə bir sıra tədbirlərimiz baş tutub. Bundan sonra da regionlarda və paytaxtda tədbirlərimiz olacaq. Əsas yarışlarımız isə əlbəyaxa döyüş növləri üzrə keçiriləcək. İdman klubumuzun nəzdində qeyri Olimpiya növləri ilə yanaşı, Olimpiya idman növləri də fəaliyyət göstərəcək.
2013-cü ildə Dubayda yarışda iştirak etmişik. 2012-ci ildə Poti şəhərində keçirilən MMA üzrə Qafqaz turnirində mükafatçılarımız olub. Həmin yarışda iki gümüş, bir bürünc medal qazandıq. 2011-ci ildə Kabardin Balkar Respublikasında MDB ölkələrinin çempionatında iştirak edən idmançılarımız da iki medal qazanıblar”.
O qeyd edib ki, idmandan başqa “Avey” idman klubu ictimai tədbirlərdə də fəal iştirak edib: “Eyni zamanda gələcəkdə təhsil sahəsinə də dəstək vermək planımız var. Həmçinin gələcəkdə əsrin bəlasına çevrilən narkomaniyaya qarşı mübarizə tədbirləri keçirmək istəyirik. Daha öncə belə seminarlarımız olub, amma daha geniş təbliğat aparmağa çalışacağıq. Klubumuzun təmsilçiləri olan idmançılara hər mənada yaxşı dəstək verəcəyik”.
Arzuman Abdülkərimovun sözlərinə görə, hazırda Qazax rayonunda idman zalları var: “Texniki baza kimi həmin zaldan istifadə edirik. Bu idman zalı Qazax Olimpiya kompleksindədir. Demək olar ki, bütün yarışlarımız orada keçirilir”.
