"Xəzər Lənkəran"ın sabiq türkiyəli baş məşqçisi və tanınmış futbol mütəxəssisi Mustafa Dənizli AFFA-nın milli komandaya gətirmək istədiyi Robert Prosineçki ilə bağlı maraqlı açıqlamalar verib.
Korner.az-ın futbolinfo.az saytına istinadən yaydığı xəbərə görə saytına 64 yaşlı çalışdırıcı xorvatiyalının yerli "Kayserispor" klubunda işlədiyi dönəmdən (2012-2013) danışıb.
O, Prosineçkinin "Beşiktaş"dan təklif aldıqdan sonra uğursuz nəticələr qazandığını deyib: "Təbii ki, onunla bağlı ən yaxşı məlumatı "Kayserispor"da onunla birgə çalışmış məşqçilər, futbolçular verə bilər. O, "Kayserispor"a yeni gələndə elə də pis deyildi. Amma sonra problemlər yaşadılar və davam edə bilmədilər. Prosineçki tanınmış simadı. Ona görə də onun yaxşı və ya pis olduğunu demək bir az çətindi. Onu "Beşiktaş" da komandaya gətirmək istəyirdi. Bu səbəbdən də "Beşiktaş"la "Kayserispor" arasında bəzi problemlər yaşandı. Həmin hadisədən sonra Prosineçki zəiflədi. Məncə, onun konsentrasiyası pozuldu və komandasına köklənə bilmədi. O, "Beşiktaş"a getmək istəyirdi. Amma istəyi baş tutmadı. Bundan sonra da işləri yaxşı getmədi".
Dənizli Berti Foqtsun gedişindən sonra boş qalan Azərbaycan milli komandasının baş məşqçi postu üçün AFFA-dan təklif almadığını bildirib: "Xeyr, Azərbaycan milli komandasından təklif almamışam. Bu barədə nəsə deməyim də düzgün çıxmaz. Ən yaxşısını AFFA rəhbərliyi bilər".
