Berti Foqts getdi… İndi hamı bir-birini təbrik edir. Sanki artıq futbol yığmamız Avropa çempionatının final mərhələsinə vəsiqə qazanıb. Bəli, son altı ildə almaniyalı mütəxəssisi tənqid etməyən qalmayıb. Nəinki idman ictimiyyəti, cəmiyyətinin bütün sahələrinin nümayəndələri qocanın işindən narazı idi. Elə AFFA prezidenti Rövnəq Abdullayev, baş katibi Elxan Məmmədov, PFL prezidenti Ramin Musayev də addımbaşı tənqid olunub. Artıq bu şəxslər haqqında nə isə yazmağın mənası yoxdur.
Sözümün mustafası başqadır. Şəxsi fikrimdir, futbol oynamağı bacarmırıq. Bu iş bizlik deyil. Hərdən ölkəmizdə futbola göstərilən marağı görəndə istəmədən kinayəli gülüşdən özümü saxlaya bilmirəm. Bu istiqamətdə alovlu çıxışları,ciddi-ciddi mübahisələri izləmək isə insanda tamamilə fərqli hisslər oyadır. Axı, niyə idman növünü bu qədər ciddiyə alırıq?
Elə götürək özümü. 25 ilə yaxındır ki, futbolla maraqlanıram, oynamışam və izləmişəm. 10 ildən çoxdur idman mətbuatındayam. Azarkeş və jurnalist kimi günüm stadionlarda keçib. Müstəqillik illərində futbolumuzun keçdiyi yolu az-çox bilirəm. Mənim kimi əli qələm tutunlar futbolumuzdakı problemlərdən o qədər danışmış, yazmışıq ki… Nə fayda?
Futbol sizə heç nə qazandırmayacaq. Sözüm kiçik yaşlarında futbolu özünə peşə seçənlərədi. Validyenlər övladlarınızın gələcəyini düşünün. Çünki futbol təsərrüfatımızda elə bir sistem qurulub ki, sizin özünüzü tapmaq imkanınız olmayacaq. Bəli, gələcəkdə Kamran Ağayev, Rəşad Sadıqov, Rauf Əliyev kimi lap yığmanını şərəfini qoruya bilərsiniz. Amma onlar da müəyyən çərçivələr daxilində futbolçu sayılırlar. Kimdən soruşsanız adını çəkdiyim, çəkmədiyim oyunçuların peşəkar olmasına şübhə ilə yanaşar. Özünüzə peşəkar ola biləcəyiniz daha faydalı başqa peşə seçin. Uduzmasınız. Çalışın indidən uduzmamağı öyrənin. Yoxsa, rəşadlar, kamranlar üçün hesabın 1:3, 0:4 və ya 0:6 olmasının fərqi yoxdur. Çünki onlar udazmağa vərdiş ediblər.
P.S. Məni bu sahəyə futbola sevgi gətirib, “xəstə” edib. Gənc jurnalistlərə sözüm var. Çalışın siz də “xəstələnməyin”. Nə qədər gec deyil, özünüzə başqa peşə seçin. Çünki bu sahə bizə yaxşı dostlardan başqa heç nə qazandırmayıb.
