“Xəzər Lənkəran” klubunun sabiq baş məşqçisi Yunis Hüseynovun müsahibəsi
– Ötən ilin noyabrında “Xəzər Lənkəran”da sizi əvəzləyən ispaniyalı Karles Martorell Bakes ölkə kubokunun 1/4 final mərhələsi öncəsi istefa verdi. Bu, sizin üçün nə dərəcədə gözlənilməz oldu?
– İndi bu haqda birmənalı fikir bildirməkdə çətinlik çəkirəm. Əlbəttə, ispaniyalının kubok öncəsi istefa verəcəyini gözləmirdim. Nəsə olub ki, gedib. Ona vaxt versəydilər, nəsə edə bilərdi.
– Bakes vəzifəsindən indi getməyinin komanda üçün daha faydalı olacağını açıqlayıb…
– Eşitdiyimə görə, ona vaxt vermək fikrində idilər. Hər halda, baş məşqçiyə vaxt lazımdır.
– “Xəzər Lənkəran”ın “altılığ”a vəsiqə qazanması böyük sual altına düşüb. Bu, sizi təəccübləndirmədi?
– Belə olacağını mən də gözləmirdim. Komanda mövsümə mənim rəhbərliyim altında başlayıb. “Xəzər Lənkəran” bu mövsüm çempionluğa oynayan komanda, buna da layiq idi. Səmimi sözümdü. Sadəcə, bir neçə oyunda xal itirdik ki, bunda da bəxtimiz gətirmədi.
– Nə çatmırdı?
– Çempion olmaq üçün 3-4 futbolçu lazım idi.
– İndi “Bakı”dan şəxsi oyunlarda geri qalan lənkəranlıların “altılığ”a düşmək şansını necə dəyərləndirərdiniz?
– Hələ gözləmək lazımdır. İndi deyə bilmərəm ki, “Bakı”, yoxsa “Xəzər Lənkəran” “altılığ”a düşəcək. Məsələn, şəxsən mən “Real”ın səfərdə “Barselona”ya 3 qol vuracağını gözləmirdim. “Xəzər Lənkəran” “altılığ”a düşməsə, artıq indidən gələcəyi fikirləşmək lazımdır. Hər halda, komanda ölkə kubokunda mübarizəni davam etdirir.
– Sizin vaxtınızda “Xəzər Lənkəran”a keçən və sonradan “Rubin”ə yollanan Ruslan Abışovun transferi axır ki gerçəkləşdi. Sizcə, uzun müddətdir oyun praktikası olmayan Abışovun əsas heyətdə yerini möhkəmlədə bilər?
– Mən Ruslanın “Rubin”lə müqavilə bağlamağına çox sevindim. Bütün azərbaycanlı futbolçulara arzu edərdim ki, xaricə, yaxşı klublara getsinlər. Abışov bu 2 ayda “Rubin”in məşqlərində iştirak edib və komandaya uyğunlaşıb. Ancaq bu, o demək deyil ki, dərhal əsas heyətə düşəcək.
– Bunun üçün ilk növbədə nə etməlidir?
– Vuruşmalı və çoxlu məşq etməli. O, ilk addımı atdı, müqavilə imzaladı. Artıq bundan sonra hər şey onun özündən asılıdır. Hər halda, “Rubin” onunla müqavilə bağlayırsa, xidmətində maraqlıdır. Ruslan əsas heyətə düşəndən sonra orada yerini saxlamağa çalışmalıdır.
apasport.az
