Bu gün 21 yaşadək futbolçular arasında AVRO-2019-un seçmə mərhələsində növbəti oyunlara start veriləcək
Azərbaycan millisi bu ay keçirəcəyi ilk qarşılaşmaya çıxacaq.
V qrupda mübarizə aparan yığmamız ikinci ev oyununda qüvvəsini sınayacaq. Samir Ələkbərovun baş məşqçisi olduğu komandamız Almaniya ilə görüşəcək.
Bu yaş qrupunda son Avropa çempionu olan Bundestim Bakıya titulun sahibi kimi gəlir. Ardıcıl ikinci oyununu almaniyalılara qarşı keçirəcək millimiz meydana sensasiya istəyi ilə çıxacaq.
Keçirdiyi bütün görüşlərdə uduzan və sonuncu pillədə qərarlaşan yığmamız doğma azarkeşlər önündə ilk xal üçün mübarizə aparacaq. Oktyabrın 6-da Kotbusda keçirilən matçda 1:6 hesabı ilə uduzan Ələkbərovun yetirmələri “Dalğa Arena”dakı matçda möcüzəyə ümidlidi.
Keçirdiyi hər üç matçda qol sevinci yaşayan yığmamız bu dəfə də rəqib qapısına yol tapmağa çalışacaq. Lakin komandamız arxa xətti də düşünməlidi. 3 görüşdə 12 top buraxan millimiz müdafiə olunmağı bacardığını çempionla imtahanda göstərməlidi.
5 gün sonra Kosovunu sınağa çəkəcək millimiz həmin qarşılaşmanı da düşünmək məcburiyyətindədi. Yığmamız “dişinə görə” olan rəqiblə matç öncəsi cəza və zədədən də qaçmalıdı ki, balkanlıları yenməkdə çətinliklə üzləşməsin.
Qeyd edək ki, qrupun sabah keçiriləcək digər matçında Kosovo İsraili qəbul edəcək.
21 yaşadək futbolçular arasında Avropa çempionatı
Seçmə mərhələ, V qrup
9 noyabr
18:00. Azərbaycan – Almaniya 0:7
Qollar:Hartel 2,46,58, Amiri 14, Seydel 28, Klostermann 60, Öztunalı 84
Azərbaycan: 12. Mustafa Kemal Özhitay, 2. Sertan Taşkın, 3. Anton Krivotsyuk, 4. Bəhlul Mustafazadə (k), 5. Serkan Baloğlu, 6. Qismət Əliyev, 8. Budaq Nəsirov, 9. Renat Dadaşov, 10. Elnur Cəfərov, 14. Yusif Nəbiyev, 21. Xəyal Nəcəfov
Ehtiyat oyunçular: 22. Aydın Bayramov, 7. Ehtiram Şahverdiyev, 11. Fərid Nəbiyev, 13. Murad Qayalı, 17. Əlibəy Məmmədli, 18. İlkin Muradov, 20. Eltun Turabov,
Baş məşqçi: Samir Ələkbərov
Almaniya: 1. Aleksandr Nübel, 2. Lukas Klosterman, 5. Timo Baumqartl, 6. Anton Valdemar, 7. Levin Öztunalı, 8. Mahmud Dahud, 10. Nadiem Amiri, 15. Filip Oşs, 16. Aaron Seydel, 18. Markel Hartel, 20. Tilo Kerer (k)
Ehtiyat oyunçular: 12. Nils Körber, 3. Yannes-Kilian Horn, 4. Cordan Torunarifa, 9. Yanni Serra, 11. Sedrik Teşort, 14. Paskal Ştenzl, 19. Florian Nehaus
Baş məşqçi: Stefan Kuntz
Baş hakim: Daniyar Saxi
Baş hakimin köməkçiləri: Alibek Aubakirov, Yevgeni Belski
Dördüncü hakim: Bulat Sarıyev (hamısı Qazaxıstan)
Bakı. “Dalğa Arena” stadionu
APA
