Yaponiyanın Azərbaycandakı fövqəladə və səlahiyyətli səfiri Şusuke Vatanabe və Lənkəran şəhər icra hakimiyyətinin başçısı Taleh Qaraşov bu gün Lənkəran şəhər Mərkəzi Stadionunda olublar. Korner.az-ın klubun rəsmi saytına istinadən məlumatına görə, mötəbər qonaqlar stadionun infrastrukturu ilə yaxından maraqlanıb, arenanın müxtəlif sahələri ilə ətraflı tanış olublar. Onların gəlişi ilə bağlı təşkil olunan tədbirdə “Xəzər Lənkəran”dan klubun direktoru Höccət Hacıyev iştirak edib.
Direktor “Xəzər Lənkəran” barədə ətraflı məlumatlandırmaqla klubun ölkə futbolunun inkişafına verdiyi təkan, klub işinə gətirdiyi çoxlu yeniliklər barədə söhbət açıb. Hacıyev, həmçinin qarşıdan gələn 17 yaşlı qızlar arasında dünya çempionatı ilə əlaqədar stadionda hansı yeniliklərin edildiyi haqqında məlumat verib.
Öz növbəsində Yaponiya səfiri stadionla tanışlıqdan məmnun qaldığını bildirməklə, ölkəsinin yığmasının qarşıdakı mundialda məhz bu stadionda oyun keçirməsinin arzuladığını bildirdi.
Sonda qonaqların şərəfinə çay süfrəsi təşkil edildi və onlara “Xəzər Lənkəran”ın müxtəlif atributikası xatirə hədiyyəsi olaraq təqdim olundu.
