Ölkəmizi Avropa Liqasında təmsil edəcək "Xəzər Lənkəran" transfer çalışmalarını davam etdirir.
Korner.az-ın klubdan əldə etdiyi məlumata görə, "ağ-yaşıllar"a iki hücumçu təklif olunub. Hər iki forvard çıxış etdiyi çempionatlarda bombardir olublar.
Əldə etdiyimiz məlumata görə, bunlar Hollandiya və Türkiyə çempionatlarının bombardirləridi. Daha doğrusu Türkiyə PTT Birinci Liqasının "snayperi", cari mövsümdə 19 qolla hamını geridə qoyan "Kayseri Ərciyəsspor"un hücumçusu Cerrard Gohu və Hollandiya ikinci divizionunun ən çox qol vuran futbolçusu Cak Tyupdu. Sonuncu Jupiliar Liqada "Volendam" forması ilə 22 qola imza atıb.
PTT Birinci Liqasının bombardiri olan Gohu Fil Dişi Sahili millisinin də futbolçusudu. 1988-ci il təvəllüdlü olan Gohu Ərciyəs təmsilçisinin əsas üzvlərindən sayılır.
Cak Tyupa gəlincə isə 1983-cü ildə anadan olan hücumçu indiyə kimi "Volendam" forması ilə 250 matça çıxıb və 145 qola imza atıb.
Hər iki hücumçu ilə bağlı Con Toşak yaxın gündə qərarını açıqlayacaq.
