Onun dönəmində "Xəzər Lənkəran" 8 oyunda 5 qələbə, bir heç-heçə və iki məğlubiyyətlə üzləşmişdi. Sonuncu dəfə kubokda "İnter"ə məğlubiyyət rəhbərliyin onu istefaya göndərməsinə səbəb oldu.
Söhbət "Xəzər Lənkəran"ın sabiq baş məşqçisi Cüneyt Biçərdən gedir. Türkiyəli mütəxəssisin dövründə göstəriciləri 7 oyunda 1 qələbə, 2 dəfə heç-heçə edən və 4 dəfə məğlub olan Yunis Hüseynovun göstəricilərinin tam əksidi desək yanılmarıq. Bəs o zaman nədən Yunis Hüseynovun istefası qəbul edilmir? Cüneyt Biçər baş məşqçi ikən komandası 8 oyunda 17 xal toplayır, Yunis Hüseynovlu komanda isə 7 oyunda cəmi 5 xal.
"Ağ-yaşıllar"ın sabiq çalışdırıcı ilə söhbətimizdə o, bunları dedi:
"Mən "Xəzər Lənkəran"da baş məşqçi olarkən heç də pis nəticələr qazanmamışdıq. Oyun və nəticə etibarı ilə hər şey qaydasında idi. Sadəcə "İnter"ə məğlubiyyətdən sonra mənə qarşı inamsızlıq olduğunu gördüm. Mən "Xəzər Lənkəran"dan ayrıldıqdan sonra da demişdim ki, mənim qoyub getdiyim komanda hər kubokda, həm də Premyer Liqada çempion ola bilər. "Turan"a iki qol vuran futbolçu Salif Ballonu da, mən tapıb gətirmişdim. Saliflə yanaşı Alvez və Sadio Tounkaranı da mən tapmışdım. Radomir Todorovun Lənkərana ikinci dəfə transferi mən orda baş məqçi olarkən oldu. Ancaq Salifi niyə göndərdilər? Bunu göndərənlərdən soruşmaq lazımdır".
