.jpeg)
“Xəzər Lənkəran” klubu “Bakı”nın Madrid “Atletiko”su ilə əməkdaşlığına rəsmi münasibətini bildirib.
Korner.az-ın klubun rəsmi saytına istinadən məlumatına görə, Azərbaycan futbolunun inkişafına xidmət göstərmək yolunda daim özünəməxsus müsbət addımları ilə fərqlənən Lənkəran təmsilçisi paytaxt təmsilçisinin də Avropanın tanınmış bir klubu ilə əməkdaşlığını yüksək qiymətləndirir.
Cənublular bəyan edir ki, bu gün heyətində Avropanın bir çox tanınmış futbol ulduzlarının toplaşdığı Madrid “Atletiko”sunun İspaniya La Liqasında formalarında “Azerbaijan – Land of Fire” reklamı ilə meydana çıxmasına necə seviniblərsə, bu gün də klubun “Bakı”nın dəvəti əsasında paytaxtımızda olmasından məmnunluq duyurlar: “Xəzər Lənkəran” klubu olaraq düşünürük ki, komandalarımızın ölkəmizi və futbolumuzu dünyada tanıtdırmaq yolunda atdığı hər bir belə addım ümumi olaraq ölkə futbolumuzun inkişafına xidmət sayılmalıdır. Hazırda klublarımızın ölkə daxilində klub infrastrukturunu formalaşdırmaq xətti ilə yanaşı hazırlayıb həyata keçirdikləri “Azerbaijan – Land of Fire” kimi böyük layihələrdə, Azərbaycan Respublikasının prezidenti cənab İlham Əliyevin “Azərbaycan futbolunun inkişafına dair dövlət proqramı”na dəstək verən gözəl bir addımdır. Bir daha “Xəzər Lənkəran” klubu olaraq “Bakı”nın həyata keçirdiyi layihəni, “Bakı” – “Atletiko” (Madrid) əməkdaşlığını yüksək qiymətləndirib dost paytaxt klubuna bu yolda uğurlar arzulayırıq”.
