Portuqaliya milli komandasının, Almaniyanın "Volfsburq" klubunun şərəfini qoruyan Vieyrinya DÇ-2014-ün seçmə oyunları ərəfəsində müsahibə verib.
– İsrail və Azərbaycanla oyunlarda nəyə ümid edirsiniz?
– Bilirik ki, qarşıdakı hər 2 oyunu qələbə ilə başa vurmalıyıq. Dünya çempionatının final mərhələsinə yüksəlmək üçün İsrail və Azərbaycanla səfər oyunlarında xal itirməməliyik. Əminəm ki, öz bacardığımız kimi oynasaq hər iki rəqibi məğlub edəcəyik.
– Səfər matçlarında meydana çıxmaqla Portuqaliya millisində debüt etmiş olacaqsınız…
– Millidə debüt edəcəyim anı səbirsizliklə gözləyirəm. Bu, mənim xəyalımdır. Ümid edirəm ki, baş məşqçimiz 2 matçdan ən azı birində mənə şans verəcək.
– Millidən dəvəti necə qarşıladınız?
– Yığmaya çağırılmağımı sevinclə qarşıladım. Mən Avro-2012-nin Bosniya və Herseqovina ilə seçmə oyununa da çağırılmışdım. Lakin onda milli forma geymək nəsib olmadı. Ümid edirəm ki, indi bu arzum gerçəkləşəcək.
– Yığmada tanıdığınız futbolçu var?
– Mənimlə gənclər yığmasında oynamış futbolçuları və “Porto”da çıxış etdiyim vaxtki komanda yoldaşlarını tanıyıram. Məncə uyğunlaşam ilə bağlı problem olmamalıdır.
– Komandada olmaq sizə hansı hissləri bəxş edir?
– Gənclər yığmasının da şərəfini qorumuşam. Artıq milliyə öyrəşmişəm. Uzun illər yığmanın şərəfini qorumaq istəyirəm.
– Qarşıdakı 2 oyunda necə xal toplamaq iqtidarındasınız?
– Qarşıdakı oyunlarda qalib gəlməliyik ki, ən pis halda Rusiya ilə 5 xallıq fərq böyüməsin.
– Bunu reallaşdırmaq nə dərəcədə mümkündür?
– Bilirik ki, rəqiblərin heyətində çoxlu səviyyəli futbolçular var. Lakin buna baxmayaraq qələbə üçün bütün şanslara malikik. Amma indi qarşıdakı oyunlarda qazanılacaq qələbə haqda düşünməliyik. Çünki bu, bizim üçün çox vacibdir. İsrail və Azərbaycanla oyunlardan sonra bütün diqqətimizi Rusiyaya yönəldəcəyik.
