“Çempionluğa 3 real namizəd var: “Qarabağ”, “Neftçi” və “İnter”. Əminliklə demək olar ki, hər üçünü bu mövsüm üçün biz avrokuboklarda görə biləcəyik”.
Bu sözləri Korner.az-a açıqlamasında Məşqçilər Komitəsinin üzvü Vaqif Sadıqov deyib.
Təcrübəli çalışdırıcı çempionluğa əsas namizədin “Qarabağ” olduğunu, “Neftçi” ilə müqayisədə “İnter”in Ağdam təmsilçisinə daha çox başağrısı ola biləcəyini söyləyib: “Klublarımız qış transfer dövründə nə qədər fəal olsalar, çempionatdakı rəqabət bir o qədər artar. Komandalar intriqanı sona qədər davam etdirməlidirlər. Hesab edirəm ki, bu gün 4-cü yer üçün mübarizə aparan bir neçə komanda var. Mövsümün əvvəlində bunlardan biri də “Xəzər Lənkəran” idi. Əgər strategiyanı dəyişmək fikirləri qətidirsə, Lənkəran təmsilçisi iddiasız kluba çevriləcək. Bu vəziyyətdə onların Avroliqa uğrunda mübarizə aparması çox çətindir. 4-cü yer uğrunda 2 komandanın mübarizə aparacağı daha real görünür: “Simurq” və “Qəbələ”. Hər 2 klub heyətini gücləndirməklə iddialarını ortaya qoya bilər. Sürpriz kimi “altılıq” uğrunda mübarizəyə “Sumqayıt” ilə AZAL da qoşula bilər. Hər 2 komanda birinci dövrənin bəzi oyunlarında çox yaxşı təsir bağışlamışdı. Bəlkə də, inandırıcı deyil, amma bu komandalar da Avroliqa uğrunda mübarizə apararaq, çempionatımıza rəng qata bilərlər. “Bakı” haqda isə təəssüf ki, çox şey demək olmur. Çempionatın əvvəlindən iddiası yox idi. Gənclərdən qurulmuş komanda, hardasa 3-4 dənə səviyyəli legioneri kluba qalmağa razı salmaqla nəticəyə oynaya bilirdi. Çox güman ki, onlar da mövsümün sonunda klubdan ayrılacaqlar. Belədə komandanın gələcəyi də sual altında düşür. “İlk üçlük” üçün yarışacaq komandalar artıq bəllidir, əsas mübarizə 4-cü pillə uğrunda olacaq. Burda “Simurq”la “Qəbələ”nin adı daha çox nəzərə çarpır. Yenə deyirəm, strategiyanın dəyişdirilməsi “Xəzər Lənkəran”a böyük zərbədir”.
