Azərbaycan Premyer Liqasında ilk yarının bombardiri Nurlan Novruzov “Bakı” klubunun düşərgəsinə qoşulmayıb.
Korner.az-ın “Report”a istinadən yaydığı məlumata görə, 22 yaşlı yarımmüdafiəçinin mövsümün növbəti hissəsinə hazırlıq məqsədilə bu gündən başlanan məşqə qatılmamasının səbəbi bilinmir.
N.Novruzov hazırlıq prosesindən kənarda qalma səbəbini nə məşqçilər korpusu, nə də rəhbərliyə deyib. Eyni zamanda Türkiyənin “Qaziantep Böyükşəhər Bələdiyyəspor” klubu ilə icarə müqaviləsinə vaxtından əvvəl xitam verilən Rəhman Hacıyev də ilk məşqdə iştirak etməyib. Klubdan hər iki futbolçuya qarşı daxili nizam-intizam qaydalarına uyğun tədbir görüləcəyi bildirilib.
Digər xəbərlərə görə, Premyer Liqanın 18 turu ərzində 9 qol vuran N.Novruzov “Bakı”nın ona olan borcu və başqa bir kluba keçək istəməsinə görə məşqə qatılmayıb.
“Bakı”nın icraçı direktoru Yaşar Seyidov isə Qol.Az-a açıqlamasında deyib ki, N.Novruzov 2015-ci ilin ilk məşqinə qoşulmada da, növbəti hazırlıq prosesində iştirak edəcək.
Yeri gəlmişkən, “Bakı”nın düşərgəsinə dörd yeni futbolçu qoşulub. Bunlar “Sumqayıt”ın futbolçusu Taqim Novruzov, “Rəvan”ın yarımmüdafiəçiləri Kamil Nurəhmədov və Ramazan Abbasov, eləcə də Azərbaycan millisinin sabiq hücumçusu Murad Hüseynovdur. Hüseynovun son klubu icarə əsasında çıxış etdiyi Rusiya “Daqdizel”i olub. Bu futbolçuların “Bakı”da qalıb-qalmayacağına baş məşqçi İbrahim Uzuncanın qərarından sonra aydınlıq gələcək.
